Trajneri i Juventusit, Maurizio Sarri, ka dalë në konferencë për shtyp, në prag të ndeshjes së ditës së nesërme, kundër Brescia, e vlefshme për javën e pestë të Serie A. Ndër të tjera, ai ka nënvizuar: “Për ne, vazhdimësia është e rëndësishme. Ekipin do ta shoh në stërvitjen e sotme, para se të vlerësoj se cilët lojtarë do ta nisin nga fillimi.
Brescia është një ekip i organizuar dhe që arrin të shprehet mirë. Tani për tani është një ekip i rrezikshëm, ka entuziasëm. Debutimi i Balotellit mund t’i japë edhe më shumë frymëzim. Në këtë moment të sezonit, përballja me këto ekipe, që gëzojnë formë të shkëlqyer fizike, është e vështirë për ne dhe për të gjithë.
Formacioni? Dua të shoh gjendjen e lojtarëve. Ronaldo shfaqi dje një lodhje të lehtë, ka shfaqur një problem muskular (aductor), por kjo është normale pas disa ndeshjeve intensive. Sot do të shohim se cila është situata dhe do të vendosim nëse dikush ka nevojë për pushim. A është ky Juventusi im? Duhet të kuptoj mirë se çfarë duhet të bëj për ekipin dhe anasjelltas, kjo është normale. Juve është një ekip në zhvillim, duhet të gjej ekuilibrin e duhur midis lojtarëve. Ne po punojmë për këtë, përshtatja e një skuadre me parimet e trajnerit është gjithmonë shumë subjektive. Shpresojmë që të arrijmë maksimumin në çdo aspekt para Krishtlindjeve.
Higuain? Nuk ka thyerje të hundës dhe duhet të jetë në dispozicion. Pati vështirësi gjatë lojës, e tillë ishte përplasja, sa mezi po merrte frymë. Zgjedhjet e mia? Ka raste kur ke nevojë për lojtarë të caktuar. Në fazën e ndërtimit, Matuidi u bë i rëndësishëm, për arsye taktike. Një tjetër ishte Douglas Costa, por ai u lëndua. Psikologjikisht na mungon shumë kapiteni Chiellini, por nga përvoja them se në një sezon të gjatë ka momente, kur lojtarët duhen alternuar. Bota e Juventusit nuk ka asgjë të veçantë dhe të ndryshme nga realitetet e tjera. Ky klub përbëhet nga njerëz, me të cilët unë jam shumë i lumtur. Nevoja për të pasur rezultate është kudo, nuk ka aq shumë ndryshim këtu.
Te Juventusi ekziston një nivel i shkëlqyer organizimi, ndaj adoptimi ishte i thjeshtë. Pastaj ekziston aspekti teknik, duhet të mësosh karakteristikat e të gjithë lojtarëve. Unë dua t’i lejoj lojtarët të shprehen në maksimum individualisht, por të mbajnë një ekuilibër ekipi. Duhet kohë për të injektuar një mënyrë të menduari dhe të luajturit. Kampionati? Nuk më lejohet të shoh ndeshje, që nuk lidhen drejtpërdrejt me ne. Nuk kam një fotografi të situates. Që Serie A është më e vështirë këtë sezon, kjo nuk duket gjë e re. Ky është një mendim i ndarë nga të gjithë dhe mendoj se është kështu”.
Discussion about this post