Kryetari i Kuvendit të Kosovës, Kadri Veseli është shprehur se nuk do të zhbëhet Gjykata Speciale. Gjatë një interviste për KTV-në, Veseli ka siguruar se si kryetar i PDK-së dhe si kryetar i Parlamentit, nuk do të lejojë befasi dhe veprime të njëanshme që e cenojnë partneritetin me SHBA-në dhe BE-në. Ai ka kërkuar nga të gjitha forcat politike që të bëhen bashkë dhe të jenë më të fortë për ta përballuar këtë proces.
“Do ta daravitim këtë mjergull të padrejtë, Gjykata Speciale pavarësisht se e padrejtë do të ndodhë, bashkëluftëtarët e mi të përgatiten, ne si institucione të përgatitemi, do të mbrojmë interesin e vendit, lufta e UÇK-së ka qenë e pastër si loti, nuk kemi çfarë të fshehim, jam i sigurtë që do të dalim si shtet dinjitoz nga ky process”, tha ndër të tjera Veseli.
Veseli nuk ka treguar se si do të veprojnë deputetët e tij që e kanë nënshkruar iniciativën për zhbërjen e speciales, por ka thënë se vendimi i tyre do të jetë në interes të Kosovës.
Një ditë më herët, ambasadori amerikan në Kosovë, Greg Delaëie, u ka dërguar mesazh të qartë të gjithë politikanëve që e mbështesin shfuqizimin e speciales. Ai tha se deputetët që e mbështesin këtë nismë dhe politikanët që i prijnë asaj do t’iu nënshtrohen pasojave specifike dhe të ashpra. (B.H/Faxweb)
Discussion about this post