Kryeministri Edi Rama i shoqëruar nga shpura e tij kanë vendosur që këtë fundjavë të mblidhen në Lezhë.
Para nisjes së mbledhjes së qeverisë, Rama doli në një konferencë për mediat ku foli me gazetarët lidhur me investimet në këtë qark.
Ajo që ra në sy gjatë kësaj konference ishte sjellja e Ramës me gazetarët.
Kryeministri dy herë brenda konferencës bëri të “paditurin” për dy televizione në vend. Herën e parë i tha gazetarit të “Ora News” nëse bëhej fjalë për televizionin “Vora News”. Ndërsa në pyetjen e dytë Rama bëri ironi me gazetarin e Fax News në Lezhë, Martin Markun.
*Replika e Ramës me gazetarin e Fax News:
Gazetari: Përshëndetje zoti Kryeministër, unë jam Martin Marku, gazetari i Fax News.
Rama: I kujt? Fox News?
Gazetari: Fax News. Është televizioni më i ri që është hapur.
Rama: Fax News…aha … Nejse s’ka rëndësi. Suksese!
Gazetari: Është folur për shëndetësi falas ndërkohë në Lezhë ka disa spitale dhe materniteti i Lezhës që vuajnë prej infrastrukturës. Çfarë do të bëhet konkretisht?
Rama: Do të vazhdojmë të bëjmë më shumë dhe është e njëjta gjë me memorialin. Jemi më mirë seç ishim. Do bëjmë më shumë.
****
Kryeministri jashtë Tiranës duket se e lë pas dore termin “kazan” duke u përpjekur të ironizojë mediat për t’i kufizuar ndikimin e tyre qoftë dhe lokalisht.
Kryeministri e di shumë mirë që në Shqipëri nuk ka “Fox News”.
Ai është një ndër ndjekësit më të rregulltë të televizioneve dhe platformave të komunikimit, pasi ka hapur dhe vetë një televizion online, por në përpjekje për t’iu shmangur pyetjeve të gazetarëve dhe për të intimiduar mediat krijon situata si kjo e sotmja.
(F.G/Faxweb)
Discussion about this post