E larguan nga kryesia e PD-së, flet për herë të parë Malltezi: Qejfmbetjet dhe inatet…

Jamarbër Malltezi është një nga 24 figurat e larguara nga kryesia e PD-së pas ndyshimeve të bëra në statut.

Qëndrimi i tij ndaj Lulzim Bashës jo pak herë ka qënë i kundërt,e megjithatë Malltezin nuk e shqetëson largimi nga Kryesia. Ky largim bëhet për shkak të ndryshimeve në statut, ku krerët e departamenteve nuk do të jetë më pjesë e kryesisë.

Lidhur me statutin e ri të PD-së, miratuar tashmë paraprakisht në Këshillin Kombëtar të 20 prillit, Malltezi u shpreh për ‘’Standard” se kishte një përpjekje për gjetjen e një emëruesi të përbashkët të grupit të punës.

Malltezi shprehet më tej dhe për zërat dhe mendimet ndryshe, teksa thotë se secili duhet të lëshojë pak nga vetja.

Pjesë nga Intervista:

Le të ndalemi tek neni 52 i statutit të ri, ku krahasuar me nenin 39 të statutit aktual, nuk perfshihen në kryesinë e PD krerët e departamenteve, si dhe do të ketë një numër anëtarësh më të ulët, që ka afrësi me Statutin e 2005. A është ky një rikthim në atë që quhet edhe “PD tradicionale”? Cili është qëndrimi juaj për këtë nen?

Ka argumente për secilin variant. Nuk përbën ndonjë dallim të madh pasi siç e theksova më lart nuk është statuti që na çoi në humbje. Më e rëndësishmja është që PD të mbledhë forumet dhe të funksionojë çdo ditë me ritëm ndërsa të tjerat nuk janë aq thelbësore.

Po propozimi i kritikëve për kufizim të mandatit të kryetarit, ç’mund të thoni për të?

Pati një diskutim për këtë pikë me argumente pro dhe kundër. Nuk jam jurist dhe as anëtar i grupit të punës për statutin, ndaj nuk mund të them argumente juridike për këtë temë, por një argument që qëndron ishte se një nen i tillë mund të çojë që grupe brenda PD të punojnë kundër veç për të hequr njërin apo tjetrin kryetar. Kjo do ishte kundraproduktive dhe kundërshtari mund t’a përdorë për të blerë veç për të sabotuar.

Çfarë mendoni se duhet të bëjnë faktorët në PD?

Duhet që secili prej nesh të shohë përpara. Historia nuk mund të kthehet pas. Qefmbetjet dhe inatet nuk na çojnë përpara. Përballë kemi krimin e organizuar, drogën dhe korrupsionin dhe nuk mund të përballemi nëse përçahemi. Duhet të jemi të gjithë bashkë për t’u përballur me këtë të keqe që ka zënë vendin. Duhet që secili të falë diçka nga vetja për hir të ecjes përpara, bashkimit dhe përballjes me krimin në pushtet. (E.K/FAXWEB.AL)