Pas përplasjeve në distancë ditë më parë mes Federatës Shqiptare të Futbollit dhe Policisë së Shtetit, Armand Duka dhe Sandër Lleshaj kanë pasur rastin të shkëmbejnë thumbime dhe replika në tryezën e organizuar sot, ku i pranishëm ishte edhe kryeministri Rama.
Armand Duka përsëriti sërish se policia është e nevojshme në stadiume. “Fakti i dhunës nuk lejon tifozërinë e shendetshme të vijë në stadium edhe të argëtohet dhe të ndihmojë futbollin. Ne do të bashkëpunojmë edhe me policinë”, ka thënë ai.
Nga ana tjetër, kryeministri Rama u shpreh se “Policia e hedh topin te Federata, Federata nuk ka si të mos e hedhë topin te policia. Topi nuk rrotullohet pa policinë.”
Ndërkohë, Ministri i Brendshëm Sandër Lleshaj, duket se nuk ka lënë t’i shpëtojë rasti për një thumbim ndaj Federatës së Futbollit. “Këta zotërinjtë e federatës dinë ta luajnë topin më mirë se policia. Policia e shtetit me ligj është e detyruar të ofrojë siguri për qytetarët e republikës kudo që janë”, ka thënë Lleshaj.
Discussion about this post