“E ndjej se Rama dhe Basha kanë bërë marrëveshje për zuzarë”, Rudina Hajdari i sulmon të gjithë nga Kuvendi

Rudina Hajdari ka sulmuar nga Kuvendi i Shqipërisë kryeministrin Edi Rama dhe Lulzim Bashën duke i etiketuar si bashkëpunëtorë në një marrëveshje të cilësuar prej saj si “marrëveshje jo për shqiptarë, por për zuzarë”

“Shumë njerëz më thonë mos, se Shqipëria nuk bëhet. Më thonë mos, se je vetëm. Unë e ndjej se Shqiëpria do të bëhet. Unë e ndjej se i detyrohem këtij vendi shumë. Ndjej se nuk jam vetëm, jemi shumë. Shumë njerëz më thonë, mos se këta kanë bërë marrëveshje. Unë e ndjej se këto kanë bërë marrëveshje, por jo për shqiptarët, por për zuzarët. I detyrohem këtij vendi shumë“, u shpreh Hajdari.

Ndërkohë dhe deputeti Ralf Gjoni i kërkoi kryetarit të grupit të PS-së Taulant Balla që të shprehet nëse kryeministri Edi Rama ka bërë një marrëveshje të fshehtë me kryetarin e PD-së, Lulzim Basha.
“Zoti Balla a ka marrëveshje politike, sepse kjo mbetet për t’u sqaruar, pasi po përflitet se Rama-Basha po përgatisin marrëveshjen e radhës politike, edhe këto janë kthyer në element statistikor, 2008, 2017, mund të bëhet edhe ndonjë tani?”, pyeti Gjoni.

Situata politike vijon të jetë kaotike prej muajsh, ku nga njëra anë opozita organizon protesta gjithmonë e më të dhunshme dhe nga ana tjetër mazhoranca qeverisëse e cila në dukje është dhe më e vendosur se kundërshtari për të mos lëvizur nga qëndrimet e saj.

Megjithëse me hapa të vogla, palët duket se e hodhën nga një mesazh ‘paqeje’ ditët e fundit. Sigurisht Edi Rama u shpreh se ishte i gatshëm të ulej me opozitën, por jo të negocionte sidomos zgjedhjet vendore dhe largimin e tij nga posti i kryeministrit. Gjithashtu dhe Lulzim Basha disa orë pas konferencës së Ramës tha se do të pranonte negociatat me qeverinë me asistencën e ndërkombëtarëve, por sigurisht pa Edi Ramën kryeministër dhe shtyrjen e zgjedhjeve vendore.

Ndonëse dukej se kërkesat ishin të njëjtat e disa muajve të gjithë e kuptuan se diçka po lëvizte, cka duket se vuri në lëvizje deputetët e rinj të opozitës të cilët qëkurse morën mandatin kërcënonin Ramën se çdo ndërveprim politik duhet ta kishte me opozitën reale, atë që ndodhet e mandatuar në parlament.

Sinjalet e Ramës, sigurisht nuk i kanë pëlqyer Rudina Hajdarit, e shpallur kryetare nga grupi i saj parlamentar opozitar dhe sigurisht asnjërit prej deputetëve që morën mandate nga LSI dhe PD në kundërshtim të vendimit politik, çka çoi dhe në përjashtimin e tyre nga partia.