Sekretari i Përgjithshëm i Partisë Demokratike Gazmend Bardhi ka reaguar me një status në rrjetin e tij social në Facebook duke u nisur nga një shkrim i gazetës gjermane Deutche Welle, ku një këshilltar i CDU flet për kushte të reja për Shqipërinë.
Bardhi teksa akuzon Kryeministrin Edi Rama dhe qeverinë e tij si të lidhur me krimin thotë se Bashkimi Europian nuk do deklarata por veprime konkrete.
Për numrin dy të demokratëve është e papranueshme që 9 kushtet për nisjen e negociatave me BE të bëhen 10 apo 11.
Postimi i plotë
“Sa shpik “armiq” të rinj, të brendshëm e të jashtëm, Edi Rama bën mirë të lexojë kushtet e partnerëve europianë që shtohen çdo herë, për shkak të keqqeverisjes së tij.
Nga 9, kushtet për nisjen e bisedimeve të anëtarësimit me Bashkimin Europian mund të bëhen 10 apo 11. Me Edi Ramën kryeministër nuk ka lajme të mira për Shqipërinë.
Vendet anëtare të Bashkimit Europian nuk gënjehen nga deklaratat pompoze dhe ligjet në letër. Ata duan veprime konkrete, por Edi Rama është i pafuqishëm të luftojë seriozisht krimin e organizuar. Pushteti i tij i ka rrënjët tek krimi dhe jo tek vota e lirë, prandaj Edi Rama është e keqja më e madhe e vendit, është imazhi më i keq i Shqipërisë në Europë. Shqipërisë i duhet ndryshimi për të bërë Shqipërinë si Europa!”
