Një lajm i pabesueshëm raportohet nga Shkodra, ku janë regjistruar 12 raste të reja me Covid 19 ndërsa rezultatet kanë dalë pas testimit të 15 personave.
Ndër 15 mostra të marra 12 kanë rezultuar pozitiv dhe kështu krijohet një panoramë e qartë për përhapjen e shpejtë të virusit.
Bëhet fjalë për familjarët e dy personave të cilët rezultuan pozitiv sot.
Lajmi është konfirmuar nga burime të Fax News pranë DSHP Shkodër ndërsa rastet janë provuar në qytetin verior.
Të gjithë personat pozitiv kanë lidhje, me dy banorët e Shkodrës në lagjen ‘Kiras’ dhe ‘Dobrac’ të cilët u diagnostifikuan me Covid-19 gjatë ditës së sotme.
Me këtë shifër shkon në 22 numri i personave të prekur me Covid-19 në Shkodër ndërkohë në rang qarku shifra është 26.
Ministria e Shëndetësisë në konferencën e përditshme për mediat në lidhje me situatën e pandemisë COVID 19 ka deklaruar se gjatë 24 orëve të fundit janë testuar 18 raste të reja me covid, ndërsa ka humbur jetën dhe një i person i moshës 78 vjeç nga Durrësi.
Sipas Rovena Dajës, epidemiologe pranë ISHP-së rezultojnë gjithashtu 8 fëmijë të prekur nga koronavirusi, ndërsa janë të intubuar 4 persona.
Në raportimin e përditshëm, MSH shprehet se 76 persona rezultojnë të shëruar, 9 prej të cilëve në 24 orët e fundit.
Deklarata e plotë:
Në vijim të komunikimit të përditshëm, Ju bëjmë me dije se vazhdon puna në terren për identifikimin e rasteve të reja dhe gjurmimin e kontakteve të rasteve të konfirmuara pozitive.
Epidemiologët në çdo njësi vendore të kujdesit shëndetësor nga veriu në jug, janë në terren dhe po bëjnë një punë të jashtëzakonshme për të identifikuar në kohë kontaktet, pas verifikimit të rasteve të dyshuara.
Ju bëjmë me dije se mëngjesin e sotëm ka ndërruar jetë një pacient 78- vjeçar nga Durrësi i konfirmuar me COVID-19. 78-vjecari ishte në gjendje të rëndë, i intubuar prej 3 ditësh dhe pavarësisht përpjekjeve të stafit mjekësor fatkeqësisht nuk arriti të mbijetojë.
Ministria e Shëndetësisë dhe Mbrotjes Sociale i shpreh ngushëllimet familjes së të ndjerit.
Deri tani janë 16 persona që kanë ndërrur jetë nga COVID-19 në Shqipëri.
Në 24 orët e fundit janë testuar 96 persona të dyshuar, prej të cilëve janë konfirmuar 18 raste të reja me COVID-19.
Deri në këto momente janë testuar 1919 raste të dyshuara dhe prej tyre janë të konfirmuar pozitivë me COVID-19, 277 raste, nga të cilët vetëm 8 janë femijë. Mosha mesatare e rasteve pozitve me COVID-19 është 50 vjeç.
Lajmi i mirë është që gjatë 24 orëve të fundit kemi 9 pacientë të shëruar duke e çuar numrin e të shëruarve nga COVID-19 në 76.
Sot janë testuar edhe 9 personel shëndetësor të cilët kanë rezultuar negativë.
Në shërbimin infektiv aktualisht janë 81 të shtruar. 8 prej tyre janë në terapi intensive ndërsa 4 nga këta janë të intubuar. Pjesa tjetër e të shtruarve në pavion janë në gjendje të stabilizuar deri në këto momente. Ndërkohë në spitalin COVID 2 “Shefqet Ndroqi” kemi 1 pacient të shtruar.
Harta e të prekurve nga COVID-19 zgjerohet në Tiranë, Durrës, Kavajë, Lezhë, Has, Elbasan, Shkodër dhe Pukë, përveç rasteve të zbuluar për të cilat po kryhet hetimi epidemiologjik dhe ku po punohet me shumë intesitet nga epidemiologët për gjurmimin e kontakteve të rasteve pozitive dhe ndërprerjen e zinxhirit të transmetimit të infeksionit.
Shpërndarja gjeografike e rasteve pozitive, është si vijon:
– Tiranë 143 raste
– Durrës 30 raste
– Lushnje 4 raste
– Elbasan 8 raste
– Fier 23 raste
– Kavajë 6 raste
– Rrogozhinë 2 raste
– Korçë 16 raste
– Vlorë 5 raste
– Shkodër 10 raste
– Lezhë 6 raste
– Berat 1 rast
– Has 8 raste
– Krujë 5 raste
-Tropojë 4 raste
– Pukë 4 raste
– Mirditë 2 raste
Ministria e Shëndetësisë dhe Mbrojtjes Sociale i kërkon qytetarëve të vijojnë të respektojnë masat e distancimit social.
Ministria e Shëndetësisë apelon qytetarët të telefonojnë në numrin 0800 40 40 për përfitimin e barnave me rimbursim dhe cdo pyetje për COVID-19 ndërsa në numrin e urgjencës kombëtare 127 duhet të telefonojnë nëse dyshojnë se kanë shenja të COVID-19.
