Në një kohë ku policia nuk ka asnjë të dyshuar për ekzekutimin e avokatit, Ravik Gurra, në një kafe në qendër të Elbasanit, nga rindërtimi i ngjarjes dalin në dukje disa detaje tronditëse.
Për ekzekutimin e 50-vjeçarit, ashtu sikurse jemi në djeni deri tani nga informacionet e policisë, autori i maskuar me një kapele ka përdorur një pistoletë me silenciator. Ndërsa për të kryer aktin ai i është afruar qetësisht Gurrës, e ka qëlluar pas koke dhe më pas është larguar me shpejtësi.
Mirëpo një detaj që tronditës është dhe fakti se pas ekzekutimit, autori, për të mos krijuar dyshime, në momentin që është drejtuar për te tavolina ku qëndronte Gurra, me një gjakftohtësi e ka përshëndetur me dorë. Kamerat e sigurisë kanë arritur të kapin autorin, por Policia dhe Prokuroria deri tani nuk kanë qenë në gjendje të bëjnë identifikimin e tij.
Ravik Gurra, babai i dy fëmijëve, prej vitesh bënte një jetë mes Shqipërisë dhe Britanisë së Madhe, ku jetonte bashkë me familjen që prej vitit 1998. Dy çështjet më të rëndësishme që 50-vjeçari ka mbrojtur lidhen me fisin Çapja në Elbasan si dhe Emiljano Shullazin në Tiranë. Përveç Shqipërisë, Gurra ushtronte profesionin e avokatit dhe në Angli, ku kishte themeluar një zyrë avokatie të quajtur “Gurra & D”, ku kryesisht merrej me çështje të emigrantëve shqiptarë.
Hetimet për zbardhjen e vrasjes së Gurrës i kanë kaluar Prokurorisë për Krimet e Rënda në Tiranë, duke qenë se bëhet fjalë për ekzekutim të funksionarëve publikë. Ndërkohë grupi hetimor që po punon për zbardhjen e ekzekutimit të tij, por ende nuk ka një të dyshuar konkret për ngjarjen.
Sipas informacioneve ngjarja ka ndodhur aq shpejtë saqë as miqtë e tij dhe dëshmitarë të tjerë aty rrotull nuk kanë arritur dotë të kuptojnë gjë, por që kanë menduar se avokatit i ka rënë të fiktë derisa kanë vënë re gjakun në tokë, moment kur dhe kanë kuptuar që ai është vrarë.
Ravik Gurra, me profesion prej 10 vitesh avokat, u qëllua me dy plumba në kokë, ndërsa ishte ulur për një kafe në një lokal bashkë me një përfaqësues të Avokatit të Popullit.
Discussion about this post