Një trup i pajetë është gjetur mëngjesin e sotëm në një kanal në fshatin Sulaj të Fierit, pranë kthesës së Hamilit. Trupi i përket 23-vjeçarit Florian Selimi, banues në Sulaj, familja e të cilit ishte shpërngulur disa vite më parë nga Tropoja.
Sipas policisë 23-vjeçari është qëlluar disa herë me thikë, pas një konflikti, dhe më pas është hedhur në kanal.
Pranë vendit ku u gjet trupi i pajetë është gjetur dhe një makinë tip ‘’Renault” me targa AA641EN, ndërsa mjeti ka pasur mjaft dëmtime, dhe dyshohet se është në pronësi të të riut.
Gazetarja e Fax News Fatmira Bajrami raporton se trupi i të riut është gjetur nga banorët e zonës, të cilët më pas kanë njoftuar dhe policinë.
Zona ku ka ndodhur vrasja nuk është e ndriçuar, dhe pa kamera sigurie, çka e bën më të vështirë identifikimin e autorëve, pavarësisht se policia thotë se ka shoqëruar derimë tani disa persona, që mund të kenë lidhje me ngjarjen.
Njoftimi i policisë:
Sot rreth orës 07:00, në vendin e quajtur “Kthesa e Hamilit” është gjetur pa shënja jete shtetasi F.S, 23 vjeç.
Nga veprimet e para hetimore dyshohet se 23-vjeçari ka ndërruar jetë si pasojë e plagës së marë nga goditja me një mjet të mprehtë(thikë), dyshohet gjatë një konflikti.
Grupi hetimor po punon për zbardhjen dhe dokumentimin e kësaj ngjarje.
Policia ka shoqëruar disa persona dhe po vijon puna për identifikimin dhe kapjen e autorit.
(E.K/Faxweb.al)
Discussion about this post