E rëndë në Himarë, i shkon në shtëpi dhe qëllon me çifte 79-vjeçarin

Një ngjarje e rëndë është shënuar së fundmi në Borsh të Himarës. Ende nuk dihet se kur ka ndodhur ngjarja, por burime të policisë së këtij qyteti bëjnë me dije se janë njoftuar në orën 09:30.

Mësohet se shtetasi Sokrat Xhuveli 57 vjeç, ka qëlluar me çifte 79-vjeçarin H. Brahimaj, brenda banesës së tij, duke e lënë të vdekur në vend.

Policia ka kryer ndalimin e autorit të dyshuar, i cili është shoqëruar në komisariat për t’u marrë në pyetje.

Detaje të Policisë së Vlorës:
Rreth orës 09:30, njoftohemi se në Borsh të Himarës ka ndodhur një vrasje! Sapo është marrë njoftimi, shërbimet e policisë kanë shkuar menjëherë në vendngjarje dhe kanë konstatuar se ngjarja ka ndodhur në lagjen “Shkallë” të Himarës në banesën e viktimës.

Konkretisht, shtetasi Sokrat Xhuveli, 57 vjeç, banues në Borsh, ka shkuar në banesën e shtetasit H.Brahimaj, 79 vjeç dhe dyshohet se e ka qëlluar me armë gjahu “Çifte” këtë të fundit duke e lënë të vdekur në vend.

Policia ka kapur menjëherë autorin dhe po bën shoqërimin e tij të menjëhershëm drejt ambienteve të policisë së Himarës për veprimet e mëtejshme.

Nga hetimet paraprake të kryera, dyshohet se ngjarja ka ndodhur për motive të dobëta. Grupi hetimor ndodhet në vendngjarje duke kryer veprimet e mëtejshme proceduriale.