Kreu i Bashkisë së Tepelenës Tërmet Peçi nuk heq dorë nga piktura e Edi Ramës në murin e qendrës sportive.
Në një intervistë për Fonin e ‘’Fiks Fare” ai thotë se Rama nuk është aty si kryeministër po si basketbollist dhe sportist mjaft i zot.
‘’E sheh gjë me kullare ti?!”, e pyet Peçi gazetarin dhe më tej sqaron se piktura nuk është bërë me autorësinë e tij.
“Ne jemi duke miratuar me vendim të këshillit bashkiak t’i vendosim kësaj qendre emrin e Kushtrim Zaçes, futbollistit të Kombëtares. Shikojeni është edhe fotoja e tij aty. Pikturat kanë pasur për qëllim të tregojnë sportistët por edhe basketbollistët që kanë arritur majat, kemi edhe Gim Fagun aty, e kjo bëhet për të motivuar brezin e ri. Piktura e Ramës nuk është me porosinë tim, është dora e autorit, kemi marrë mendime e kemi biseduar. Këtu piktori e ka bërë në kokë të tij”,- thotë Peçi për Fiks Fare.
Duke vazhduar sqarimin e tij, Peçi nuk nguron ta quajë kryeministrin Rama njeriun që ka bërë më shumë se çdo tjetër për Tepelenën.
Ne kemi përzgjedhur elitën e kombëtares, aty kryeministri është pa kollare, pra nuk është kryeministër. Nëse përbën problem është diçka që rregullohet. Ai njeriu që shikoni ju atje si sportist ka bërë për Tepelenën më shumë se çdo njeri tjetër. Nuk e mban Tërmeti atë, e mban gjithë Tepelena dhe gjithë Shqipëria. I dashur mik ai që aty nuk lëviz”, – shtoi kryebashkiaku.
Discussion about this post