Dy shqiptarë, trafikantë droge, të cilët e fshihnin lëndën narkotike në bebelina, janë vënë në prangat e policisë në Itali. Arrestimi i tyre u krye pasditen e së hënës, nën akuzën e “shpërndarjes së drogës”.
U vu fillimisht në pranga shtetasi Elton Gegici 31 vjeç, i cili u kap në Fornacette (Calcinaia), teksa po i jepte brenda një lokali një dozë kokaine një të droguarit në zonë. Mësohet se ai e kishte fshehur drogën brenda bebelinës së djalit të porsalindur që e shoqja shqiptare mbante në krahë.
Gjatë hetimeve u zbulua edhe bashkëpunëtori i tij, një tjetër shqiptar, i identifikuar si Ledio Pllumi 41 vjeç, i cili pas arrestimit të Gegicit nxitoi në shtëpinë e shokut për të fshehur drogën. Por ai u kap në flagrancë nga policia gjatë kërkimit të shtëpisë.
Në kontrollin e ushtruar në banesë, policia gjeti dhe sekuestroi 70 doza kokainë dhe materiale të tjera për paketimin e drogës.
Dy të arrestuarit u transferuan në burgun e Pisa-s. Policia italiane bën me dije se ishte në kërkim të shqiptarëve prej disa kohësh. Sipas saj, shqiptari Gegici përdorte djalin e porsalindur për transportimin e drogës. (XH.A/SHUPLAKA)
Discussion about this post