Bashkëshortja e Admir Muratajt është ajo që ka shkuar në morg për të identifikuar trupin e personit të vrarë, pas shkëmbimit të zjarrit me Policinë ditën e djeshme në Rinas.
Albana Murataj ka konfirmuar se trupi i përkiste bashkëshortit të saj. Ndërkohë që në ambientet e morgut kanë qenë dhe familjarë të tjerë të Admirit, të cilët janë afruar duke qarë dhe duke ngushëlluar gruan e tij.
Mësohet se Murataj e ka marrë plumbin në pjesën e syrit, dhe kjo ka bërë të vështirë identifikimin e trupit nga ana e familjarëve.
Duke folur për gazetarët e pranishëm, i vëllai i Admirit është shprehur se lajmin e kishte mësuar nga televizionet, dhe ishte kthyer nga Kosova për të mësuar më shumë për ngjarjen.
Gjatë ditës së djeshme ai kishte përdorur një maske silikoni dhe syze në mënyrë që të mos identifikohej nga ana e policisë. Vetëm në momentin kur Policia e ka qëlluar në kokë, është zbuluar se poshtë burrit ‘’tullac”, fshihej një person rreth të 40-tave dhe me flokë.
Pranë trupit të tij të pajetë u gjetën kallëpe tritoli dhe granata, ndërsa një pjesë e arsenalit të armëve u përdorën dhe gjatë shkëmbimit të zjarrit që Murataj pati me patrullën e FNSH-së.
Murataj ka qenë ende në kërkim për organizimin e dy grabitjeve të bujshme atë të në Qafë-Kashar pranë Rinasit dhe grabitjen e një banke te ‘Stacioni i Trenit’ në Tiranë, ku kanë qenë të përfshirë edhe disa ish-Komando të ushtrisë shqiptare.
Admir Murataj ishte personi i vetëm që ka qenë në kërkim për grabitjet e mëhershme, ndërsa në burg gjendet dhe vëllai i tij Aleksandër Murataj.
Zbulimi i serisë së autorësisë së grabitjeve ku implikohej dhe Murataj u bë në shkurt të 2017, ku policia dhe Prokuroria arrestuan anëtarët e bandës, të cilëve iu gjetën edhe një pjesë të shumave të vjedhura.
Kujtojmë se për bashkëpunëtorët në grabitjet e mëparshme të Muratajt, Prokuroria kishte dhënë pretencën në muajin Janar të këtij viti.
Prokurori i çështjes kërkoi 20 vite burg për Dash Kupën dhe Neim Avdylin; 19 vite për Ernest Kupën; 16 vite burg për Fatjon Xhyliun, Dritan Sinanajn dhe Aleksandër Muratajn; si dhe 5 vite e 8 muaj burgim për Ditjon Memlikën dhe Admir Çerpjen.
Admir Murataj rezulton të jetë arratisur nga burgu i Trikallës në 2013 bashkë me grupin e Ilir Kupës. Ai vuante dënimin për grabitjen e një banke në Larisa të Greqisë. Ai është shoqëruar në polici kur u arrestua grupi, por u la i lirë për mungesë provash.
(E.K/FAXWEB.AL)
