Situata në Maqedoni duket se doli jashtë kontrollit me rrahje dhe grushtet ndaj deputetëve. Gjithçka nisi pas zgjedhjes në krye të Parlamentit të shqiptarit Telat Xhaferri.
Një nga personat e plagosur më rëndë ishte dhe deputeti shqiptar Ziadin Sela. Nga disa pamje të transmetuara në media, po ende jo të konfirmuara ai është tërhequr zvarrë nga dhunuesit.
Nga ana tjetër vetë stafi i tij në një komunikim në faqen e deputetit në rrjetet sociale janë shprehur se gjendja e tij është e qëndrueshme.
‘’Për shkak të situatës së jashtëzakonshme që po kalon vendi, jemi të detyruar të lëshojmë këtë komunikatë, e cila synon të qetësojë qytetarët që pyesin për shëndetin e Kryetarit të LR-PDSH-së z.Ziadin Sela.
Falë Zotit ai është mirë. Ka dëmtime të ndryshme por gjendja e tij është nën kontroll dhe nuk paraqet asnjë rrezik për jetën.
Falenderojmë te gjithë ata të cilët duket se kanë zbardhur natën deri tash e që po qëndrojnë këmbëngulës pranë nesh.
Bëjmë thirrje për qetësi, ju urojmë një natë të qetë, duke ju siguruar që Ky nuk është fillimi i Asgjëje, ky është vetëm Fundi i një të Keqeje…Fundi i pashmangshëm i saj’’, thuhet në komunikatë.
Njoftim për gjendjen e deputetit ka dhënë edhe mjeku që e ka asistuar Ilir Hasani për ‘’tetovaSit. Ai është shprehur se Sela ka disa lëndime në kokë por që është në gjendje të qëndrueshme.
“Gjendja e Selës ështëe qëndrueshme, komunikon, ka disa lëndime në kokë, është në kujdesin e mjekëve specialist vazhdimisht, nuk është për tu alarmuar, presim përmirsimin e tij”, ka deklaruar mjeku.
(E.K/SHUPLAKA)
