Partia Demokratike dhe opozita në përgjithësi vazhdon të pretendojë se mediat në Shqipëri kontrollohen nga qeveria dhe janë në shërbim të saj. Më i fundit që e deklaron këtë është shefi i zyrës së shtypit në selinë blu, Edi Lesi, i cili merr për shembull emisionin e sotëm në Top-Channel, “Të gjithë për një”.
Sipas tij, drejtuesit e emisionit, Eno Popi dhe Ledion Liço kanë mbrojtur qeverinë dhe kanë sulmuar opozitën gjatë transmetimit live.
“Kur edhe Eno e Ledioni që në ditën e tretë të janarit, në prime-time, ngrohin si dhe sa dinë ata rrënjët e qeverisë dhe sulmojnë opozitën, merret me mend ç’vit do jetë dhe sa e balancuar do jetë media”, shkruan Edi Lesi në Facebook.
Ndërkohë që nuk ka munguar as reagimi i urbanistit dhe këshilltarit bashkiak të Tiranës, Besnik Aliaj.
“Po unë bëra 10 faqe raport me shkeljet e planit urbanistik e jo që nuk dhanë një fjalë, por u morën vetëm në lajme krysore me 30 sekonda që nënkryetari i bashkisë më shante mua. Sulmi ndaj meje doemos ishte interes publik. Plani privat … por ka Zot në këtë botë”, shkruan Aliaj duke patur parasysh debatin në Këshillin Bashkiak për miratimin e Planit Urbanistik të Tiranës. (A.R/SHUPLAKA)
