Duket se qeveria Rama do të përdorë çdo manovrë për të shmangur përballjen me opozitën dhe protestat e qytetarëve.
Në këtë kuadër pas mbledhjes së konferencës së kryetarëve, me gjasa me praninë e Taulant Ballës dhe Gramoz Ruçit, është parashikuar që seanca që do të mbahej në Kuvend të enjten të zhvillohet në orën 17:00 të ditës së sotme.
Lidhur me ndryshimit e seancës në Kuvend, ka reaguar dhe Edi Paloka, i cili ngre pyetjes se sa mund të zgjasë mbledhja e parlamentit në ilegalitet.
“Kuvendi ilegjitim, mblidhet ne ilegalitet. Pasi e rrethuan me tela me gjemba dhe salduan dyert hyrese, tani kane filluar ta mbledhin dhe ne ilegalitet. Seancen e se enjtes , po kerkojne ta mbledhin fshehtas sot ne oren 17.00. Sa mendoni se do zgjasni keshtu?! Tik-tak… “, shkruan Paloka në reagimin e tij.
Opozita kishte parashikuar që të mbante të enjten një protestë përpara Kuvendit, po duket se kjo manovër e fundit shmang sërish përballjen mes kampeve politike.
Në seancën e sotme pritet të diskutohet lidhur me strukturën dhe buxhetin e organeve të reja të drejtësisë, KLGJ dhe KLP.
Kujtojmë se skemën e mospërballjes Rama e ndoqi dhe të enjten e kaluar, ku anuloi seancën parlamentare, me pretendimin se protesta e opozitës do të ishte e dhunshme, dhe do të cënonte dhe godinat e institucioneve, gjë që nuk ndodhi realisht.
Jo më larg se dje në media u publikua dhe mesaazhi që Rama iu kishte dërguar deputetëve të tij, ku iu kërkonte që që mos komentonin asnjë prej veprimeve të deputetëve opozitarë që kanë djegur mandatin.
“E gjithë vëmendja jonë do të jetë tek njerëzit e zakonshëm pa dallim dhe komunikimi ynë do të jetë për ta e me ta. Le të merren kadrinjtë e kazanët me dokrrat e dëshpërimit të tyre dhe le të vlojnë së bashku në zjarrin e mandateve të tradhtuara”, thuhej në mesazhin e Ramës drejtuar deputetëve.
(E.K/FAXWEB.AL)
