Në një kohë që Ura e Kukësit iu bllokua nga ana e qytetarëve kryeministri Edi Rama ka mbërritur në qytet përmes aeroportit të ri, nga i cili ende nuk kanë nisur fluturimet. (Lexo ketu)
Teksa ka nisur takimin pranë aeroportit të Kukësit të dhënë me PPP, Rama dashje pa dashje ritheksoi edhe njëherë disa ide për ndarjen mes Veriut dhe Jugut të Shqipërisë.
Duke iu referuar këtij investimi, Rama tha se dhe në Vlorë do të ndërtohet aeroporti, ndaj nuk ka nevojë për xhelozira mes qyteteve.
‘’Sa herë që vij në Kukës dhe flas për aeroportin në Facebook-un tim hyjnë vlonjatët dhe komentojnë për aeroportin e tyre. E njëjta gjë ndodh edhe kur shkoj në Vlorë, pasi bëheni xhelozë ju të Kukësit”, u shpreh Rama, ndërsa të njëjtin paralelizëm hoqi dhe me ndërtimet e stadiumeve në Kukës dhe në Vlorë.
‘’Aeroporti i Kukësit është një pikë e re strategjike për Veriun e vendit, dhe do të sjellë ndikimin e tij dhe në biznes”, tha më tej Rama, ku nuk nguroi t’iu kërkonte edhe votën në zgjedhjet lokale kuksianëve.
‘’Ka ardhur koha që Bashkinë të na e jepni ne, në mënyrë që të bëjmë ca gjëra që janë bllokuar. Na është dashur 4 muaj që të marrim leje te Bashkia në mënyrë që të ndërtonim spitalin, edhe pse fondi ishte dhënë nga ana e qeverisë”, deklaroi kryeministri.
Në fjalën e tij Rama u ndal dhe te protesta për taksën në Rrugën e Kombit, ku tha se qeveria reflektoi nga gabimi i bërë.
(E.K/FAXWEB.AL)
