Sekretari i Përgjithshëm i Partisë Demokratike Gazmend Bardhi ka reaguar në lidhje me propozimin e kryeministrit Rama për të dalë nga kriza.
Rama tha që opozita të futet në zgjedhjet lokale të qershorit dhe në rast se fiton një bashki më shumë se PS, vendi të shkojë drejt zgjedhjeve të parakohshme. Lidhur me këtë Bardhi shkruan:
Propozimi i Ramës për zgjidhjen e krizës: “Më lini ti vjedh edhe zgjedhjet vendore dhe po ti fitojë opozita zgjedhjet që unë do vjedh, shkojmë pastaj në zgjedhje të parakohshme.”
Deklaratat e Ramës u bënë në Kongresin që zhvilloi sot Partia Socialiste, ku konfirmoi dhe Erion Veliaj si kandidat për Bashkinë e Tiranës.
“Unë e kam një ftesë për ju, jeni ju që ja keni rrokanisni kokën ndërkombëtarëve për reformën zgjedhore.
Hajdeni ulemi ta miratojmë sëbashku atë reformë, të biem dakord t’i eksperimentojmë në disa zona edhe votimin dhe numërimin elektronik. Me që keni shumë qejf shit-blerjen e votës, do miratojmë çdo masë që do propozojë në Parlament doktoresha e shit-bjerjes së votës. Ne i votojmë vetë në Parlament me deputetë e rinj që ju i keni zgjedhur.
Nëse ju në zgjedhjet e 30 qershorit, do fitoni një bashki më shumë se ne. Jemi të gatshëm të shkojmë në zgjedhje të parakohshme. E di që ju s’do e pranoni këtë sfidë. Ju se mundni dot PS as në Kukës dhe as në Skrapar, dhe lerë pastaj në të gjithë Shqipërinë”, tha Rama, teksa i ka quajtur anëtarët e opozitës i një “shportë karavidhesh”.
(E.K/FAXWEB.AL)
