Natën vonë, Edi Rama mbërrin me avion nga Zvicra për takim urgjent me Ilir Metën. Të dy firmosin marrëveshjen e re të koalicionit PS-LSI.
”Shuplaka” mëson se Rama dhe Meta kanë preferuar të takohen të dy, vetëm me praninë e një njeriu, Johannes Hahn, Eurokomisioneri për Politikat e Fqinjësisë dhe Negociatat për Zgjerimin në BE.
Ai është kumbari i koalicionit të tyre parazgjedhor, pas 4 viteve të para.
Tani Partisë Demokratike dhe Lulzim Bashës i mbetet të qëndrojë në çadër ose të futen në zgjedhje të vetëm. Nuk ka më asnjë dyshim. Rama dhe Meta kanë vendosur të sfidojnë së bashku Bashën, ndërkohë që me ta është bashkuar edhe Ben Blushi, Shpëtim Idrizi dhe Gjergj Bojaxhi.
Në terren do t’i ndihmojë me vota edhe Koço Kokëdhima, duke kontribuar më shumë për Sarandën. Menjëherë pas koalicionit ka reflektuar edhe Paulin Stërkaj, i cili ka menduar t’i ndihmojë në Shkodër, edhe pas qejfmbetjeve me Edi Ramën.
Endri Fuga, i relaksuar nga rezultati i ka dërguar një mesazh në WhatsApp Sokol Ballës për t’i dhënë lajmin e madh, por misioni është dekonspiruar nga portalet.
”Top Channel” nuk ia ka dalë të jetë i pari në publikimin e lajmit. Nga brenda LSI-së mësohet se ka qenë Spartak Braho ai që ka këmbëngulur për firmosjen finale, por Luan Rama ka dashur ta kundërshtojë ashpër duke përdorur si argument mëdyshjet e tij.
Burime të sigurta pranë dy partive tregojnë se i gjithë informacioni i mësipërm nuk është aspak i vërtetë, kështu që redaksia e ”Shuplaka”-s del në konkluzionin se sa është shkruar më lart është botuar pa verifikim, shpejt e shpejt, ashtu siç bëjnë një pjesë e madhe e portaleve në vend.
Veçse me një ndryshim, sot është 1 prilli! Gëzuar!/(V.G- SHUPLAKA)
Discussion about this post