Kryeministri Edi Rama, ka shpërndarë një video-mesazh në rrjetet sociale ku ka dhënë detaje mbi aktivitetin përmbyllës të fushatës elektorale të PS-së, që do të zhvillohet sot në Tiranë.
Në mesazhin e tij, Rama njoftoi se mitingu final do të organizohet me pjesëmarrjen ekskluzive të mbështetësve dhe kandidatëve nga qarku i Tiranës, ndërsa në qarqet e tjera ka nisur puna e strukturave për angazhimin me komisionet zgjedhore në kuadër të votimit më 11 maj.
Kreu i mazhorancës theksoi gjithashtu rritjen e ndjeshme të votave të ardhura nga diaspora në ditët e fundit, pas thirrjeve të përsëritura për pjesëmarrje.
Ai e cilësoi këtë angazhim si një “pjesëmarrje të lartë”, që tregon mobilizimin dhe interesin në rritje të shqiptarëve jashtë vendit për procesin zgjedhor.
Gjithashtu shprehu kënaqësinë që i dhanë për herë të parë mundësinë diasporës për të votuar, duke shtuar se ishte kurioz për gjykimin që ata do japin dhe se do e respektonte atë vendim.
“Jam jashtëzakonisht i lumtur që ne i dhamë mundësinë të votojnë dhe jashtëzakonisht i lumtur që po e shfrytëzojnë këtë mundësi për votën e parë në histori të shqiptarëve jashtë, por edhe këtë sfidë të Shqipërisë në historinë e 11 majit. Dhe patjetër jam kurioz që ta shoh vendimin e diasporës, gjykimin e diasporës dhe patjetër me respektin më të madh”, tha kryesocialisti.
