“Nervida ka nevojë për gjak, është në gjendje të rëndë,”, flet babai i vajzës së plagosur në Elbasan: Kur u zgjua kërkoi shoqet e saj

Gazetari Edmond Dibra, babai i Denisa Dibrës, vajzës që mbeti e plagosur në aksidentin në Elbasan, ka treguar për mediat të gjithë skenën e aksidentit të rëndë.

Ai thotë se vajza e tij është përmendur prej orës 05:00 të mëngjesit, ndërsa nuk mban mend asgjë nga aksidenti. Ndërsa shoqja e saj, Nervida Garunja është në gjendje më të rëndë shëndetësore dhe aktualisht ka nevojë për dhurim gjaku.

“Goca ime është përmendur në orën 05:00 të mëngjesit dhe nuk e mban mend aksidentin, ka kërkuar shoqet e saj.

Shkova te spitali i Traumës dhe aty pashë vajzën. Gjendja e Nervidës është kritike. Vajza ka nevojë për dhurim gjaku. Çdo dhurim është shpëtim për jetën e saj.

Ajo është si vajza ime. Si ajo dhe ato që nuk jetojnë më. Familja e saj ndodhet në Shkodër dhe presin trupin e Lusindës”, u shpreh Edmond Dibra për mediat.

Behar Pema, shoferi i automjetit tip ” Benz” që goditi nga pas makinën ku udhëtonin katër vajzat ka qenë duke udhëtuar me shpejtësi 160 km në orë.Sipas ekspertëve auto-teknikë ai nuk ka frenuar, pasi gjatë ekspertimit në vendin e ngjarjes nuk ka pasur shenja frenimi.

Pema rezultoi i dehur në testin e alkoolit të kryer menjëherë pas ngjarjes dhe u vu në pranga nga uniformat blu.