Në një kohë kur flitet për një bashkëqeverisje mes PS-së dhe PD-së, pas arritjes së marrëveshjes mes Ramës dhe Bashës, deputeti Edmond Spaho vetëm sa i ka përforcuar këto ide.
Në një aktivitet të Partisë Demokratike në Elbasan, Spaho është shprehur se pas zgjedhjeve të 25 qershorit LSI dhe PDIU-ja do dalin në opozitë.
“Jemi pranë fitores së 25 Qershorit. Ky aktivitet zhvillohet që të marrim hapa urgjente për arritjen e suksesit në 25 Qershor. Ju jemi mirënjohës për kontributin e dhënë gjatë protestes së 3 muajve të fundit, pasi PD ka meritën për krijimin e kushteve për zgjedhje të lira e të ndershme.
PD ndërkombëtarizoi çështjen e kanabizimit të Shqipërisë për t’i dhënë fund ketij fenomeni. Në tre muaj i rrëzuam gjysmën e qeverisë Edi Ramës.
Larguan Sajmir Tahirin, simbolin e kanabizimit etj. Ndërpremë për herë të parë koalicionet parazgjedhore. LSI & PDIU do jenë partitë e opozitës pas 25 Qershorit”, janë fjalët e Spahos.
Më tej ai ka shtuar se do jetë Partia Demokratike ajo e cila do triumfojë zgjedhjet e Qershorit. Megjithatë duhet pranuar se kjo nuk nënkupton se PS dhe PD do bëhen aleate pas zgjedhjeve siç raportojnë shumë media, për sa kohë që nuk është sqaruar një gjë e tillë dhe nuk është përmendur PS. (D.D/Shuplaka)
Discussion about this post