Edmond Zhulali ka qenë sot në një lidhje telefonike në emisionin ‘’Mirëmëngjes nga Xhaxhiu” në ‘’Fax News”. Zhulali ka folur për ndarjen nga jeta të kompozitorit Aleksandër Lalo, duke thënë se vendit do ti mungojë artisti i madh.
“Së pari dua të shpreh ngushëllimet për familjen, miqtë dhe ndjekësit e tij. Unë jam shumë i emocionuar në këto momente, pasi humbëm jo vetëm një njeri me vlera, po edhe një mik. Vlera më e madhe që ai ka lënë pas është muzika e filmave, ai ka shkruar rreth 2 mijë filma ku ai ka treguar fuqinë e tij të mendimit muzikor.
Po ai nuk ishte vetëm kompozitor i filmave, pasi na la shumë vepra në gjini të tjera të artit. Ai kishte një individualitet në krijimtarinë e tij, saqë edhe sot kur e dëgjon je në gjendje të thuash që kjo është muzika e tij.
Nëse një njeri ka talent të jashtëzakonshëm në atë që ai bën, kjo e bën atë të jetë dhe antikonformist. Në gjithë botën artistët njihen që nuk janë konformist në asgjë. Lalo para dy vitesh ka marrë nga Presidenti Nishani titullin ‘’Mjeshtër i Madh”, duke i dhënë atë që ai ka merituar. Dimri i Fundit është një nga muzikat më të bukura të Aleksandër Lalo. Edhe vitet e fundit ka shkruar muzikë, pra një muzikantë që do të na mungojë”, u shpreh Edmond Zhulali.
(E.K/Faxweb)
Discussion about this post