Eduard Selami, kandidati për kreun e PD-së ka treguar se çfarë ka diskutuar në takimin me Sali Berishën. Selami ka theksuar se me Berishën ka folur për mënyrën sesi do të dalin të fortë nga humbja e zgjedhjeve në 25 qershor.
“Po, takimi u kërkua nga z. Berisha. Në fakt, unë kam komunikim të vazhdueshëm me të, por në rastin për të cilin po flasim takimi u kërkua prej tij. U diskutua për shqetësime të përbashkëta, duke mos hyrë në detaje për garën. Kemi diskutuar se si do të dalim më të fortë nga kjo humbje. Kur unë të jem kryetar, z. Berisha do të jetë një pjesë e rëndësishme e konsultimit tim me të. Por vendimet do të merren në mënyrë kolegjiale nga strukturat e PD, nga Këshilli Kombëtar”, u shpreh Selami për “Panorama”.
Po ashtu edhe Astrit Patozi ka pasur një takim me Berishën vetëm pak ditë më parë dhe është shprehuhr se ka diskutuar për gjendjen që ndodhet PD.
“Unë e kam takuar dje zotin Berisha, por ky nuk qe as takim i fshehtë por as zyrtar. Unë mund të them se jemi takuar si dy demokratë që janë të shqetësuar për traumën që ka përjetuar PD gjatë zgjedhje dhe për më tepër këtë që ka ndodhur pas humbjes.
Berisha e lexon më mirë nga të gjithë rezultatin traumatik të PD-së. Tani ideja qëndron nëse do të ringrihet PD-ja apo do të ndahet?
Se me veprimet e zotit Basha të çojnë te e dyta. Këtë kam diskutuar edhe me zotin Berisha. Kaq mund të them për këtë takim.
Por meqë ju doni një fjali konkrete nga takimi, ju them se jemi ndarë pa asnjë keqkuptim nga takimi”, tha Patozi. (J.V/Shuplaka)
Discussion about this post