20 persona u lënduan sot në një përplasje trenash në provincën Minya të Egjiptit që shkaktoi rënien e dy vagonave në një kanal irrigacioni, njoftuan autoritetet egjiptiane, transmeton Anadolu.
Hekurudhat Kombëtare të Egjiptit (ENR) thanë në një deklaratë se aksidenti ndodhi kur një tren u përplas me pjesën e pasme të një tjetri që udhëtonte nga Aswan në Kajro në zonën midis Abu Qurqas dhe Minya. Përplasja bëri që dy vagonë nga treni i dytë të dalin nga shinat dhe të bien në Kanalin Ibrahimiyah.
ENR-ja ka dërguar pajisje emergjente dhe vinça në vendngjarje. Treni u nda nga vagonët e dalë nga shinat dhe rifilloi udhëtimin e tij drejt Kajros, sipas deklaratës, megjithëse nuk u dhanë detaje të mëtejshme.
Ministria e Shëndetësisë e Egjiptit raportoi se incidenti ndodhi të dielën në mëngjes, duke shkaktuar një rritje të gatishmërisë mjekësore në spitalet e afërta. Njëzet e tre autoambulanca u dërguan në vendin e aksidentit dhe ekzaminimet fillestare treguan se lëndimet përfshinin mavijosje, gërvishtje dhe plagë sipërfaqësore. Nuk raportohet për viktima, ndërsa mjekët vazhdojnë të bëjnë vlerësimin e të lënduarve.
Vitet e fundit, Egjipti ka punuar për të përmirësuar sistemin e tij hekurudhor për të parandaluar aksidentet, duke u fokusuar në përmirësimin e pajisjeve, infrastrukturës dhe trajnimit të fuqisë punëtore. Ministri i Transportit Kamel al-Wazir ka thënë se rreth 2,5 milionë njerëz përdorin hekurudhat e Egjiptit çdo ditë.
