Milva Ekonomi njofton se Shqipëria renditet e 13-ta në botë dhe e para në rajon për tregtinë e lirë, nga 186 vende të botës.
“Dua t’ju informoj për një lajm tjetër tepër pozitiv për Shqipërinë. Këtë e konfirmon studimi më i fundit i “Heritage Foundation”, sipas të cilit Shqipëria renditet e 13-ta në Botë nga 186 ekonomi në indeksin e Tregtisë së lirë për vitin 2017. Ky indeks është ndër më prestigjiozët në nivel ndërkombëtar dhe sipas këtij klasifikimi, Shqipëria arrin në vend të parë në rajon.”, shkruan Ekonomi në njoftimin e saj.
Sipas raportit, qasja kryesore e këtij indeksi bazohet në peshën që zënë tarifat doganore si dhe barrierat jo tarifore.
Të dhënat:
“Sipas sistemit të harmonizuar të nomenklaturës së mallrave për Shqipërinë:
- 49% e kësaj liste është me tarifë doganore 0%;
- 18% e kësaj liste është me tarifë doganore 2%;
- 0.3% e kësaj liste është me tarifë doganore 5%;
- 2,4% e kësaj liste është me tarifë doganore 6% ;
- 19,3% e kësaj liste është me tarifë doganore 10%;
- 12% e kësaj liste është me tarifë doganore 15%;”
“Heritage Foundation” publikon çdo vit një raport të tillë dhe këtë vit rezulton që Shqipëria është përmirësuar me 20 pozicione në renditje.
