Drejtori i Përgjithshëm i Komisariatit të Lezhës, Ermal Muçaj në një prononcim ekskluziv për Opinion.al ka bërë me dije se janë sekuestruar një sasi e konsiderueshme droge, si dhe arrestuar 15 persona në qytetin e Rrëshenit, Mirditë.
Muçaj theksoi se aksioni është kryer nga Policia e Qarkut Lezhë pas verifikimeve të njëpasnjëshme në zonë. Ai bëri me dije se operacioni ka filluar që në orët e para të ditës së sotme, rreth orës 3:00 dhe, pasi kanë vënë re persona të dyshimtë që hynin dhe dilnin nga vendi ku mbahej droga, është realizuar aksioni i ndërhyrjes së forcave të policisë.
Ndërkaq, lidhur me sasinë e lëndës narkotike që është kapur në vendin e qujatur magazinat e pularisë në dalje të qytetit të Rrëshenit, ende nuk dihet, pasi droga nuk është peshuar.
Referuar të dhënave të kreut të Policisë Lezhë, aksioni i kapjes së lëndës narkotike në qytetin e Rrëshenit është ndërmarrë nga Policia e Qarkut Lezhë, në bashkëpunim me Komisariatin e Mirditës.
Më pas, në ndihmë, kanë ardhur edhe forcat e FNSH së Lezhës, të cilët kanë bërë të mundur edhe shoqërimin e të arrestuarve nga Mirdita në Lezhë.