Në lindjen e Largët përparon inxhinieria gjenetike me hibridin njeri-kafshë. Në Kinë kërkimet vijojnë ndërsa Japonia sapo ka autorizuar eksperimentet e para, duke hequr ligjin që bllokonte zhvillimin e embrioneve të tilla përtej ditës së 14 të jetës. Studimet konsistojnë në organizma kafshësh në të cilët janë transplantuar qeliza njerëzore.
Kjo praktikë teknikisht është e mundur, por deri më sot është konsideruar e papranueshme nga ana etike pothuajse në mbarë botën. Përveç disa vendeve që lejojnë eksperimentet, me kushtëzime që të kryhen vetëm në rastet që shërbejnë për të shpëtuar në të ardhmen jetë njerëzish.
Aktualisht një ekip amerikano spanjoll është zhvendosur në Kinë, ku kërkimet lejohen dhe nën drejtimin e prof. Juan Carlos Belmonte është krijuar një embrion hibrid njeri-majmun, që sigurisht nuk është lejuar të përfundojë ciklin, por që deri në fazën e studiuar ka treguar shenja pozitive përsa i përket përshtatjes së qelizave të njeriut në trupin e majmunit, raporton Klan Plus.
Ideja në thelb të këtyre teknikave është transplanti i qelizave staminale të njeriut tek trupi i një kafshe, për të përfituar në të ardhmen e largët organe të gatshme për njeriun tek kafshët e rritjes masive.
Aktualisht Kina nuk ka ligje që të ndalin këto teknika, studimin dhe eksperimentimin, ndryshe nga vendet perëndimore, gjë që ka inkurajuar shkencëtarët perëndimorë të spostohen atje për kërkimet e tyre.
