Interpol Tirana ka ekstraduar sot “të fortin” e Mirditës, i cili vrau një burrë dhe një grua në vitin 1997 dhe më pas u arratis në Britani.
Ai është Gjergj Çupi, 48 vjeç, banues në Kaçinar të Mirditës.
Gjykata e Rrethit Gjyqësor Mirditë e ka dënuar Cupi me 25 vjet burgim, për kryerjen e veprave penale “Vrasje me paramendim”, “Vrasje me paramendim mbetur në tentativë” dhe “Armëmbajtje pa leje”.
Historia e vrasjeve daton që në vitin 1992 dhe lidhet me përplasjen e dy familjeve Çupi e Ndreca në Kaçinar të Mirditës për hakmarrje.
Fillimisht vritet vëllai i Gjergj Çupit, Petrit Çupi. Asokohe, i pandehuri Mirash Ndreca u dënua me 22 vite burgim dhe vuajti dënimin deri në momentin që burgjet u hapën në vitin 1997.
Mirash Ndreca u arratis ndërsa Gjergj Çupi duke përfituar nga situata kur popullsia u armatos nga hapja e depove të armëve, mori një armë dhe më datë 27. 07. 1997 ka kryer vrasjen me paramendim të Mirash Ndrecës. Si pasojë e plumbave mbeti viktimë edhe shtetësja Donika Kadeli ndërsa u plagosën Prend Perkeqi dhe Frrok Perkeqi. Gjergj Çupi u shpreh se mori gjakun e vëllait të tij dhe u dënua për vrasjen me paramendim të Mirash Ndrecës dhe Donika Kadelit si dhe vrasje e mbetur në tentativë për Prend Perkeqin dhe Frrok Perkeqin.
Autoritetet britanike e arrestuan Çupin në vitin 2005 ndërsa tanimë kanë vendosur ekstradimin e tij drejt Shqipërisë. (M.D/ Shuplaka)
