Ambasadori rus në Tiranë Karpushin ka njoftuar që prej dy javësh ndihet i rrezikuar nga një grup ekstremistësh islamike nga Kosova dhe Maqedonia, raporton Vizion Plus.
Ky grup njoftohet se është vendosur në një apartament shumë pranë Ambasadës Ruse në Tiranë dhe vëzhgon prej disa kohësh të gjitha lëvizjet e ambasadorit si dhe të stafit të përfaqësisë diplomatike.
Ai ka theksuar se ekstremistet e ISIS janë ne gjendje të veprojnë gjithkund dhe në çdo rrethanë. Karpushin ka njoftuar edhe stafin e ambasadës që të evitoje sa më shumë pjesëmarrjen në aktivitete masive.
Aktet terroriste, sipas ambasadorit rus kanë rritur shqetësimin për sigurinë e ambasadave ruse, përfshirë dhe atë në Shqipëri.
Ambasada ka kërkuar shtim të personelit, për të sjellë nga Moska në Tiranë një grup ekspertësh të inteligjencës, që do të mund të përballonin kërcënime të tilla.
Para disa ditësh kryeministri Rama kishte deklaruar se nëse Bashkimi Europian do të vonojë integrimin e Shqipërisë dhe Kosovës si pasojë do të krijohej mundësia e bashkimit të dy shteteve shqiptare, gjë që u dënua nga Moska zyrtare me anë të një komenti nga Ministria e Jashtme ruse.
Kërkesa e ambasadës për të sjellë eksperte te inteligjencës ruse nga Moska, vjen në kohën kur Shqipëria zyrtarisht po shkon drejt zgjedhjeve megjithë krizën politike që ka kapluar vendin prej muajsh.
Para disa muajsh ambasadori rus në Turqi u vra nga një terrorist në Ankara, ngjarje e cila tronditi botën.
(M.D/ Shuplaka)
