Duke folur nga Kuvendi i Shqipërisë në lidhje me negociatatat Shqipëri-BE Rama ka bërë sërish një kapërcim nga bisedimet me shtetet skeptike si Holanda e Franca te Reforma në Drejtësi.
Sërish ai e ka parë delen e zezë që njollos Shqipërinë në procesin kompleks të integrimit tek prokurorët dhe gjykatësit duke iu referuar sërish prokurorit të Durrësit dhe gjykatëses që dha vendimin për Liridon Pulën, drejtori i Kadastrës Durrës i cili u arrestua pak ditë më parë me firmë e prokurorit Arjan Ndoji.
“Kemi një grup prokurorësh dhe gjykatësish që kanë krijuar një grup kçk (të kapësh ça të kapësh), por do ti shpallim në kërkim anëtarët e kësaj organizate kriminale. Janë qindra grupe të tilla kçk, derisa tu vijë ora e Vettingut”, tha Rama.
Prania e zv.kryeministrit Braçe në seancën gjyqsore ndaj Liridon Pulës si dhe deklaratat e forta të tij dhe Ramës kundër prokurorit Ndoji si dhe gjyqtares që la në burg ish-drejtorin ‘detyroi’ KLP të dilte në një deklaratë për shtyp ku theksonte se këto deklarata ndërhyjnë në punën e pavarur të gjyqësorit.
Edhe pse Rama trumbeton me të madhe drejtësinë e re, me sa duket nuk e ka në plan tu vërë veshin as institucioneve të reja të dala nga kjo reformë.
“Janë në proces për grabitjen e tokave, për të marrë tokën e tjetrit apo për të legalizuar trualle me 7 kate pa leje arrijnë të fusin prokurorin dhe gjykatësin që punojnë për bandat. Por si i bëhet? Dihet, është Organizata KÇK. Sa herë policia ka dështuar në përballje me gjykatën për vrasës që pasi kanë dalë kanë ridalë, për përdhunues që pasi kanë dalë kanë dhunuar. Sa herë ka ndodhur, me mijëra herë. Janë grupet me të mëdhenj kriminale në Shqipëri. Si mundet sot një prokuror që dikush regjistron tokën dhe prokurori regjistron 100 fishin e asaj që dikujt i është dhuruar. Keni ju ndonjë krushk, kunat a zemërgjërë që t’ju dhurojë 100 fishin e vlerës që ka. E prisja këtu reagimin e Ballit Kombëtar por, kur të flisja për krimin jo për pulat. Ndaj kur të flasim për pulat e diskutojmë. Sot jemi në proces tranzicioni të sistemit të drejtësisë që të jetë i mjaftueshëm, por deri atëherë nuk ka garanci për asnjë, për asnjë, për asnjë, dhe këtë garanci do ta japë vetëm Gjykata Kushtetuese“, vijoi Rama me tone të forta në Kuvend.
