Policia Rrugore e Elbasanit ka marrë masa administrative ndaj dy drejtuesve të automjeteve, pas verifikimit të dy indicieve të ardhura nga qytetarët dhe rrjetet sociale, lidhur me shkelje të rregullave të qarkullimit rrugor.
Pas kryerjes së veprimeve hetimore dhe identifikimit të automjeteve dhe drejtuesve të tyre, janë marrë këto masa:
Një drejtues automjeti është ndëshkuar me masë administrative në vlerën 10 000 lekë, bazuar në pikat 10 dhe 16 të nenit 146 të Kodit Rrugor, pasi ka kryer parakalime të gabuara në kushte të fushëpamjes së kufizuar në aksin rrugor Peqin-Elbasan.
Një tjetër drejtues mjeti është gjobitur me masë administrative 10 000 lekë, në bazë të pikës 12 të nenit 7 të Kodit Rrugor, pasi ka qarkulluar në sens të kundërt në bulevardin “Aqif Pasha”. Për këtë drejtues automjeti, është vendosur gjithashtu masa plotësuese pezullimi i lejes së drejtimit.
Drejtoria Vendore e Policisë Elbasan falënderon qytetarët për bashkëpunimin dhe i fton të vijojnë të denoncojnë çdo rast shkeljeje të rregullave të qarkullimit rrugor, në numrin pa pagesë 112 ose në Komisariatin Dixhital. Policia garanton reagim të menjëhershëm dhe zbatim të ligjit ndaj çdo shkelësi.
