Presidenti i Republikës, Ilir Meta do t’i drejtohet Komisionit të Venecias për opinion për emërimet në Gjykatën Kushtetuese, që hapën një debat të madh pak kohë më parë. Diçka të tillë e bëri të ditur vetë presidenti. Ai u shpreh në një intervistë për “RTV Ora” se ka fakte që tregojnë se kryetari i Këshillit të Emërimeve në Drejtësi, Ardian Dvorani dhe mazhoranca kanë kryer shkelje.
“Edhe unë si President do ti drejtoj pyetjet e mia Venecias për dy emërimet në Gjykatën Kushtetuese për arsye se është e qartë se jo vetëm në rastin e parë Presidenti ka pasur të drejtë dhe ka respektuar Kushtetutën. Kjo kërkesë është për të marrë në mbrojtje personin përgjegjës që ka shkelur Kushtetutën, Dvoranin, për të cilin ka dhe kallëzim nga Presidenti. Është dhe përpjekje për të mbajtur një fake çështje.
Ekzistojnë shkelje nga Dvorani dhe Kuvendi. Nuk ka asnjë shans që Venecia të hedhë në kosh emrin e vet duke u përfshirë në këto lojëra të mazhorancës dhe për fat të keq disa ndërkombëtarëve që janë përfshirë në këtë çështje dhe i kanë dalë garant Dvoranit. Ata janë kapur në flagrancë. E gjykoj përpjekje për të mbrojtur një person që është në hetim nga prokuroria dhe krimet ligjore janë tepër flagrante”, tha Ilir Meta.
Kreu i shtetit nënvizoi se në dorë ka edhe shumë video të tjera për Dvoranin që po presin të publikohen. “Videot do të vazhdojnë. Ka plot të tjera në pritje. Përderisa të tjerët dezinformojnë, unë jam i vendosur për të bërë transparence”, deklaroi presidenti Ilir Meta.
Discussion about this post