Partia Demokratike përmes nënkryetarit Enkelejd Alibeaj ka reaguar për zgjedhjen e Ulsi Manjës në postin e ministrit të drejtësisë, duke e konsideruar këtë një provokim ndaj shoqërisë shqiptare.
Duke sjellë në vëmendje përgjimet e dosjes së Dibrës, ku Manja flet me një drejtues policie dhe i thotë atij se meriton të “shkojë dhe të emërohet më lart”, PD thotë se vetë i zgjedhuri si ministër duhet të ishte përpara drejtësisë dhe jo në krye të saj.
Reagimi i Alibeajt në emër të PD-së:
Emërimi i Ulsi Manjës si Ministër Drejtësie, është një provokim ndaj shoqërisë shqiptare. Qytetarët tanë dhe bota mbarë ia njeh krimet që ka kryer në bashkëpunim me Edi Ramën.
Caktimi në krye të Drejtësisë të një prej simboleve të pandëshkueshmërisë së krimeve elektorale të Dosjes 184, është një shembull negativ që cënon edhe më shumë besimin tek institucionet kur ato dorëzohen tek individë që duhet të ishin përpara drejtësisë e jo në krye të saj.
Ky është një tjetër ilustrim kuptimplotë se si masakra zgjedhore nuk zgjidhi asgjë për qytetarët. Përkundrazi, vota e vjedhur përdoret si imunitet për krimet e shkuara dhe ato të reja në dëm të Shqipërisë dhe shqiptarëve.
Discussion about this post