EMRAT/ OFL u dërgon formular për deklarim pasurie, kush janë dy të rrezikshmit e Tiranës

Në zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL vijon intensivisht punën për kryerjen e veprimeve komplekse, në bashkëpunim me strukturat e tjera të Policisë së Shtetit.

Në kuadër të Aktit Normativ nr. 1, datë 31.01.2020, OFL u ka dërguar kërkesat për vetëdeklarim të pasurisë, shtetasve:

Aurel Hoxhallari, banues në Tiranë, i dënuar për veprat penale “Vrasja me paramendim, në bashkëpunim”, “Armëmbajtja pa leje” dhe “Prodhimi dhe shitja e narkotikëve”;

Në vitin 2015, Aurel Hoxhallari dhe kushëriri i tij janë arrestuar nga ana e Policisë si porositës të dyshuar për vrasjen e Pajtim Sejranit, në “Rrugën e Kavajës” në Tiranë. Por Gjykata e Krimeve të Rënda i la ata të lirë për mungesë provash. Mbi Hoxhallarin rëndojnë akuza se ai ka qenë baron i drogës në Spanjë.

Elidon Kotorri, banues në Tiranë, i dënuar për veprat penale “Vrasja me paramendim, e kryer në bashkëpunim” dhe “Armëmbajtja pa leje”;

Elidon Kotorri është një personazh i botës së krimit në vitet 2000, i dënuar me burgim të përjetshëm 15 vite më parë për vrasjen e tre personave dhe plagosjen e një tjetri. Bëhet fjalë për ngjarjen e 11 janarit të vitit 2000 në Tiranë, ku mbetën të vdekur shtetasit Andi Hasani, Sokol Alushi, Gazmend Zeneli dhe u plagos Gregor Stefani.

Gjykata e Tiranës ka vendosur në prill të 2015 të pranojë kërkesën e tij për gjykim të shkurtuar, duke bërë kështu që Kotorri, i cili e ka pranuar krimin, t’i shpëtojë burgimit të përjetshëm. Elidon Kotorri u la përfundimisht i lirë në gusht të vitit 2019.

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së, të cilat do t’i dërgohen SPAK-ut, për veprime të mëtejshme.

OFL bën me dije se të gjithë personat që iu është dërguar kërkesa me shkrim për vetëdeklarimin e burimeve të pasurisë, i kanë plotësuar formularët dhe i kanë dorëzuar pranë OFL-së, e cila ka vijuar me procedurat, sipas përcaktimit në Aktin Normativ nr. 1, të datës 31 janar 2020.