Drejtoria e Forcës së Posaçme Operacionale e Policisë së Shtetit ka finalizuar operacionin “Operacionalja 35”, duke lokalizuar dhe arrestuar një shtetas të shpallur në kërkim ndërkombëtar. 40-vjeçari Arjan Rrokaj, banues në Vlorë, ishte dënuar me 8 vjet burg nga Gjykata e Breshias, Itali, për trafikim të lëndëve narkotike.
Operacioni u realizua pas shkëmbimit të informacionit me homologët italianë, ku u mor informacion për vendndodhjen e tij. Rrokaj u arrestua në Vlorë dhe do të ekstradohet në Itali për të vuajtur dënimin. Interpol Tirana dhe Interpol Roma janë duke kryer procedurat për ekstradimin e tij.
Njoftimi:
Policia e Shtetit
Drejtoria e Forcës së Posaçme Operacionale finalizoi operacionin e koduar “Operacionalja 35”, për lokalizimin dhe kapjen e një shtetasi në kërkim ndërkombëtar.
I dënuar nga Gjykata e Breshias, me 8 vjet burgim, për trafikim të lëndëve narkotike, kapet në Vlorë dhe arrestohet me qëllim ekstradimin, 40-vjeçari.
Bazuar në informacionet e siguruara nga inteligjenca informative, për vendndodhjen e një shtetasi në kërkim ndërkombëtar, Drejtoria e Forcës së Posaçme Operacionale e Drejtorisë së Përgjithshme të Policisë së Shtetit, pas shkëmbimit të informacionit me homologët e Policisë italiane, ka organizuar dhe finalizuar operacionin policor të koduar “Operacionalja 35”.
Gjatë operacionit, është kapur në Vlorë dhe është arrestuar me qëllim ekstradimin në Itali, shtetasi Arjan Rrokaj, 40 vjeç, banues në Vlorë.
Ky shtetas ishte shpallur në kërkim ndërkombëtar pasi Gjykata e Breshias, Itali, e ka dënuar me 8 vjet burgim, për trafikim të lëndëve narkotike.
Interpol Tirana dhe Interpol Roma do të kryejnë procedurat për ekstradimin e këtij shtetasi, në Itali.
