Pavarësisht se kanë kaluar dy ditë nga ngjarja e grabitjes pranë Rinasit ende nuk ka një përgjigje të saktë në lidhje me pistat që të çojnë drejt grabitësve. Ministri i Brendshëm Saimir Tahiri shpreh bindjen se policia do të zbardhë grabitjen e Qafë Kasharit, dhe rezultatet e hetimit do të bëhen të ditura në momentin e duhur.
“Të jeni të bindur që siç kemi zbardhur ngjarje të tjera do e zbardhim dhe këtë. Policia e Shtetit nuk dorëzohet dhe as intimidohet nga sulmet publike. Detyrën e ka bërë dhe atëherë ku përveç kriminaliteti në rrugë ka pasur dhe banditizëm në Parlament. Aseti ynë i çmuar është besimi i qytetarëve, angazhimi, forcimi i kapaciteteve njerëzore. Policia do të bëjë detyrën dhe do ta zbardhë këtë ngjarje, siç ka bërë me ato të kaluarat”, tha ministri Tahiri për mediat.
Ai foli në ceremoninë e organizuar në repartin RENEA, ku u dorëzuan pajisjet e reja për këtë strukturë të rendit. Shumë shpejt tha ministri, pas FNSH-së dhe RENEA do të jetë me godinë të re.
“Katër milionë dollarë për pajisje të reja, armatim të ri dhe çdo instrument tjetër që gjatë punës së RENEA është i domosdoshëm për të luftuar kriminalitetin. Ky nuk është i vetmi sektor ku kemi investuar”, tha Tahiri. (E.K/SHUPLAKA)
Discussion about this post