Me rastin e 10 vjetorit të Shqipërisë në NATO, sot në Tiranë do të zhvillohen një sërë aktivitetesh të nivelit të lartë ku do jenë të pranishëm përfaqësues nga 29 vendet anëtare të Aleancës së Atlantikut Verior, ministra të Mbrojtjes dhe shefa shtabesh të këtyre vendeve.
Qeveria shqiptare ka përgatitur një spot për këtë 10 vjetor, që duket se ka nxitur reagime nga politikanë e ish-deputetë të Parlamentit të Shqipërisë.
Ish-ministri Ylli Manjani ka reagur nëpërmjet një statusi në rrjetet sociale ku thotë që në këtë spot mohohet historia e sotme duke i atribuar anëtarësimin në NATO Olta Xhaçkës dhe kryeministrit Rama, duke harruar se ky anëtarësim është firmosur nga Sali Berisha dhe qeveria e tij.
“Sot po shihnim pa zë Aldon, kur doli një spot publicitar që përpiqej të na kujtonte anëtarësimin në NATO.
Nga spoti kuptohej që jemi në NATO falë Olta Xhaçkës dhe Edi Ramës. Të tjerë nuk kishte.
Sa turp! Mohojnë edhe historinë e sotme le më trashëgiminë historike!
Meqë ra fjala, për të freskuar memorien e 30 viteve të fundit, kujtoj se:
Hapjen e bisedimeve te para për anëtarësim në BE i ka firmosur Sali Berisha.
Anëtarësimin në NATO e ka firmosur Sali Berisha.
Liberalizimin e vizave e kreu Sali Berisha.” ka shkruar Manjani në statusin e tij.
Ndërkohë shton që Edi Rama ka firmosur vetëm për koncensione e PPP. “Ëndërron të firmosë një gjë të madhe, ndaj firmos për kulla të larta…”
Kujtojmë se Shqipëria është anëtarësuar në NATO më 7 prill 2009.
Statusi i plotë i Manjanit:
Prej vitesh, në shtëpi ndjekim rregullin që lajme dhe emisione politike nuk i shohim. Për çështje të higjenës mendore e ndjekim me besnikëri.
E shkel unë ndonjëherë vjedhurazi, por në tërësi e ruajmë këtë rregull. Interneti dhe NETFLIX janë më me variacion.
Sot po shihnim pa zë Aldon, kur doli një spot publicitar që përpiqej të na kujtonte anëtarësimin në NATO.
Nga spoti kuptohej që jemi në NATO falë Olta Xhaçkës dhe Edi Ramës. Të tjerë nuk kishte.
Sa turp! Mohojnë edhe historinë e sotme le më trashëgiminë historike!
Meqë ra fjala, për të freskuar memorien e 30 viteve të fundit, kujtoj se:
- Anëtarësimin në OSBE e ka firmosur Ramiz Alia.
- Anëtarësimin në Këshillin e Europës e ka firmosur Sali Berisha.
- Hapjen e bisedimeve te para për anëtarësim në BE i ka firmosur Sali Berisha.
- Anëtarësimin në NATO e ka firmosur Sali Berisha.
- Liberalizimin e vizave e kreu Sali Berisha.
Edi Rama ka firmosur vetëm për koncensione e PPP. Ëndërron të firmosë një gjë të madhe, ndaj firmos për kulla të larta…
Kjo është historia, na pëlqen apo jo!
(J.B/FAXWEB.AL)
