Përtej imazhit “të akullt e të ftohtë” që ministrja e Mbrotjes shfaq për shkak të pozicionit të saj në kabinetin qeveritar, ajo shfaqet herë herë edhe jashtë këtyre kornizave, siç është edhe rasti më i fundit në emisionin “Vila 24”.
E pyetur rreth dëshirave të saj të fëmijërisë, ministrja Mimi Kodheli ka treguar se kur ishte ende shumë e vogël, dëshironte të bëhej faturino autobusi për të shkuar tek shtëpia e gjyshes pa paguar para. Por kjo dëshirë u ndoq nga të tjera dëshira si ajo e të bërit gazetare.
“Ëndrra ime? Të bëhesha gazetare. Kur isha e vogël fare, doja të bëhesha faturino autobusi pasi doja të shkoja pa para tek gjyshja ime. Pastaj e ndryshova dhe doja të bëhesha gazetare”, ka rrëfyer ajo. Një tjetër rast, kur ajo ka dalë jashtë kornizave të ministres, është kur rrëfeu arsyen e emrit që mban, një zgjedhje e babait të saj, njohës shumë i mirë i muzikës klasike dhe fans i Giacomo Puccini-t me veprën “La Boheme”.
