Ish-deputeti Lefter Maliqi ishte i ftuar në hapësirën e intervistës në Fax News, ku bëri një analizë të thellë dhe kritike mbi situatën e krijuar pas zgjedhjeve të fundit, duke hedhur akuza të drejtpërdrejta për manipulim elektoral, mungesë organizimi dhe përgjegjësi të dobët nga ana e opozitës.
Sipas tij, rezultati zgjedhor nuk është vetëm një humbje për opozitën, por një dëm i thellë për vetë demokracinë dhe mbështetësit e saj. Ai theksoi se besimi i pensionistëve dhe i shtresave të gjera të qytetarëve është zhdukur totalisht pas kësaj disfate.
“Me Ramën nuk ka më fitore nga opozita e bashkuar nëse nuk ndryshojmë rrënjësisht mënyrën e funksionimit,” – u shpreh Maliqi.
Ai akuzoi drejtpërdrejt institucionet si SPAK dhe KQZ për bashkëpunim në atë që e quajti “masakër elektorale”, duke shtuar se rezultati i rilindjes ishte përtej çdo parashikimi dhe se numri i mandateve është i diskutueshëm.
“E dimë të gjithë që Rilindja nuk i ka 71 mandatet realisht,” – theksoi ai.
Deputetë pa meritë dhe lista të mbyllura
Një tjetër pikë e fortë e kritikës ishte mënyra e përzgjedhjes së deputetëve, ku ai shprehu indinjatë për faktin që disa kanë hyrë në Parlament me vetëm 3 mijë vota, falë sistemit të listave të mbyllura.
“Koha e festimeve ka mbaruar. Tani është koha që disa deputetë të kërkojnë ndjesë,” – tha ai.
Maliqi solli në vëmendje se, ndonëse ishin të vetëdijshëm për përballjen me një “narkoshtet” dhe një “makineri shtetërore të mirëorganizuar”, korrupsioni elektoral nuk funksionoi aq sa mendohej, veçanërisht në qarkun e Beratit.
Një pjesë e rëndësishme e kritikës u drejtua ndaj parties Demokratike, ku denoncoi përçarje të brendshme, mungesë koordinimi dhe xhelozi mes drejtuesve.
“U përqendruam në zonat që i kishim fituar dhe harruam pjesën tjetër të vendit. Ishte një gabim strategjik,” – deklaroi ai.
Ai tha se personalisht është përpjekur të organizojë fushatën, ndërsa të tjerët kanë qenë të përfshirë në konflikte të brendshme.
Duke folur për përgjegjësinë e drejtuesve lokalë dhe kandidatëve, ai theksoi:
“Një person që nuk prodhon më vota, duhet të largohet. Nuk mund të qëndrojmë më me justifikime,”.
Maliqi kritikoi mungesën e kontaktit me bazën, ku sipas tij, shumë kandidatë nuk e kanë kërkuar as votën dhe nuk kanë pasur as vëzhgues në qendrat e votimit.
Në përfundim, bëri një thirrje për reflektim të thellë dhe riorganizim të opozitës:
“Fitorja arrihet me strategji, mobilizim dhe lidership të vërtetë. Duhet të kemi drejtues politik të rinj, që janë në kontakt të përditshëm me demokratët. Kjo është rruga e vetme për të fituar,” – përfundoi ai.
