Erenestina Halili gruaja që s’mposhtet nga dhimbja, publikon librin e dytë, “Për ma t’parën lule t’kopshtit tem”

Poetja dhe gazetarja Erenestina Halili, pas humbjes tragjike të të birit në një aksident automobilistik, Kejdi Halilit, nuk është ndaluar me veprat e saj. Së fundmi vjen rishtazi me një libër homazh “Për ma t’parën lule t’kopshtit tem”, siç edhe vetë shkruan, ku tregon dhimbjen e saj. 

“Gjithçka është shkruar aty vjen për nënat e njerëzit si unë”, thekson ajo për “Psikologjia”.

INTERVISTA:

Shembull i një gruaje  dhe nëne që dhimbjes i  ke dhënë çdo ditë jetë me poezi në faqen tuaj dhe më së fundi botimi i një libri. Çfarë përfaqëson “Bizulz” për ju?

Bibulz, është Bulëz e Biblës, pikëtakimi i përhershëm i jetës sime. Asgjë nuk mundet qenia njerëzore të paracaktojë, as të parashikojë, sepse sfidat, sprovat nuk janë as në dëshirën tonë, as në dorën tonë.

Jo vetëm për shkak të vokacionit tim familjar shekullor, por edhe pse e kam dëshmuar në çdo rast të mundshëm, mbetem idhtare e dashurisë së Zotit…

A është ky shpërthim krijues i ngacmuar edhe nga rrethanat?

 Nisja e këtij libri është një moment përvoje mistike personale, të cilën dëshiroj ta mbaj në xhepin tim të shpirtit, prej asaj nate e përvoje erdhën me rradhë poezitë mbi motive biblike me një reference jetësore të përditshme. Gjithçka është shkruar aty vjen për nënat e njerëzit si unë.

Cili është mesazhi që do të donit të përçohej përmes këtij libri?

Ky libër e thotë qënë titull, kumtimin tim.

Pse keni zgjedhur që ta sillni në gjuhën e Fishtës dhe të Camajt?

Gegërishtja është gjuha e shpirtit tim, është Sol-i i këngës sime, janë telat e violës dhe pikat e ujit që bëjnë rrathë. Ky libër mban tre cikle: Ati, Biri, Shpirti,për mua shënjon Këngën e Këngëve , përtej përditshmërisë e urisë konsumiste moderne. Është një pushim për të pyetur ekzistencialisht dhe për t’u gjegjur …

Dialogoj me Krijuesin dhe përpiqem të ngrihem pa peshën e trupit lart, për të vështruar përkohësinë tonë, jemi kaq të përkohshëm e nuk duam të dëgjojmë se të thirrur janë shumë, të zgjedhur janë pak…

Libri botohet edhe këtë rradhë në Kosovë dhe paraqitet në Panair nga shtëpia botuese“ Faik Konica”. (Faxweb)