“Edhe pse kishte krahun e lënduar, ia përthyenin më keq”, Ergys Mërtiri shpjegon çfarë ndodhi në rrugë para se të shoqërohej në polici (E gjithë ngjarja që u fshi nga efektivët)

Ergys Mërtiri ishte një nga aktivistët e Aleancës për Mbrojtjen e Teatrit, i cili u shoqërua ditën e djeshme për në polici pas një konflikti me efektivët në rrugë. Ai tha se filmoi gjithçka nga dhuna brutale e efektivëve dhe arsyeja e vetme përse e shoqëruan në polici ishte për ti fshirë videot se ishin prova që tregonin dhunën e tyre.

Ergys Mërtiri: Janë dhunuar vetëm 2 persona në komisariat. Ata kanë dalë dhe do të ndjekin të drejtën e tyre për të cuar në ndjekje penale cështjen. Janë goditur brenda në komisariat, kjo është shumë e rëndë dhe për këtë duhet mbajtur përgjegjësi.

Policia nuk duhet të godasë askund. Policia është sjellë jo vetëm në mënyrë të dhunshme, por edhe brutale, të egër, të ashpër, si në rrugë, ashtu dhe në komisariat. Në komisariat është ushtruar dhunë drejtpërdrejt, është gjakosur një prej personave, kjo është akoma më e rëndë.

Unë jam marrë në polici dhe kur i pyesja se për cfarë po më merrnin, thonin ta shpjegojmë në komisariat. Nuk ma tregonin, ndërkohë që më kishin marrë telefonin me dhunë dhe kur shkova në komisariat, më dhanë telefonin dhe më nxorën. Aty vura re se videot e mia ishin fshirë. Ka shpëtuar vetëm një video ku Donaldi ishte live në faqen e Aleancës. Por të gjitha videot e tjera të procesit që ka zgjatur mbi çerek ore ku po ushtrohej dhunë ndaj qytetarit, forcë, po thoshte që e kam krahun e lënduar nga protesta për vrasjen e 25 vjecarit Rasha, ndërsa ata ia përthyenin më keq.

Nuk ka asnjë lloj llogjike. Unë u afrova se e gjeta rastësisht në rrugë. Po mos të isha unë, kushedi cdo i kishin bërë se nuk kishin as dëshmitarë dhe u afrova ti pyes se përse po e merrnin qytetarin. Kur shkova unë, më thanë provoje se do ta pësosh dhe ti. Më pas erdhën të tjerë nga Aleanca dhe ndodhi ajo që ndodhi.

Videot u fshinë sepse tregonin të gjithë brutalitetin e policisë, si kërcënonin të tjerët përreth, si godisnin. Ishte për të shmangur provat e egërsisë së tyre. Unë kështu e mendoj se nuk ka asnjë arsye pse duhet të merresha në polici. I thashë që jam gazetar dhe kam të drejtë. Ky shtet është policor dhe janë shenjat e një shteti që nuk janë në shërbim të qytetarit, por duke ushtruar një detyrë politike për të bërë zap qytetarët.

Ndërkohë, ditën e sotme në orën 18:00 është paralajmëruar se do të mbahet protesta para Ministrisë së Brendshme pasi artistët kërkojnë drejtësi për dhunën e ushtruar nga efektivët. (A.M/Faxweb.al)