Ervin Bushati: PS e LSI të hyjnë edhe të ndara në zgjedhje, rëndësi ka që procesi të jetë ligjor

Deputeti i Partisë Socialiste, Ervin Bushati tha sot në rubrikën “Opinion”  se me skadimin e afatit për regjistrimin e koalicioneve në KQZ, LSI e PS mund të shkojnë ndarazi në zgjedhje, por sipas tij e rëndësishme është që të zbatohet ligji.

Bushati tha se bashkëpunimi  mes LSI dhe PS është pozitiv. Ai u shpreh se diskutimet brenda koalicionit janë të kuptueshme, duke u nisur nga fakti se çdo parti politike ka platformën e saj politike.

“Bashkëpunimi brenda mazhorancës ka qenë pozitiv. Duhet të kemi parasysh se të gjitha reformat që kanë kërkuar shumicë të cilësuar janë votuar me të gjitha votat. Kjo është mazhoranca më e stabilizuar në vend. Një mazhorancë që nuk ka bërë prapa në asnjë moment. Ne kemi votuar në Kuvend të gjithë ligjet që kemi ndërmarrë. Besoj se mazhoranca është e stabilizuar. Mungesa e garës me opozitës e shtyn mazhorancës që të marrë angazhim edhe më shumë. Duhet t’i shohim politikanët, mazhorancën, apo edhe drejtuesit e tjerë, si një detyrë që u mbron në një afat të caktuar. Dita më e mirë në këtë vend, do të jetë kur qytetarët t’i shohin politikanët si punëtorët e këtij vendi. Politika duhet të shihet si gjithë profesionet që janë në shërbim të qytetarit. Vota ka qenë masive për çdo projektligj për çdo reformë. Brenda çdo forcave politike ka diskutime, imagjino brenda nja mazhoracnë që ka forca politike me platforma dhe axhenda të ndryshme politike. Çdo ambicie është më se normale. Një forcë politike pa ambicie është e vdekur”,- u shpreh Bushati.

“Nuk ka ndonjë problem, le të shkojnë edhe të ndara. Rëndësi ka të zbatohet ligji. Rëndësi ka të jemi sa më të ftohtë, dhe mekanizmi të jetë ligjor. Nëse ne i bindemi vetëm ligjeve, atëherë kjo pjesa e pasioneve do të zhduket. Sa më e qetë të jetë politika, aq më mirë për qytetarët. Forcat politike në Shqipëri herë pas herë kanë qenë të pamatura, të pamaturuara”,- tha më tej Bushati. (M.D/ Shuplaka)