Policia njoftoi se ditën e sotme ka mbetur i plagosur me armë zjarri në fshatin Tapizë të Krujës një 35 vjeçar.
Personi i plagosur është shtetasi Ervin Kodra dhe është kushëri i Durim Bamit dhe dyshohet se atentati i sotëm mund të ketë lidhje me këtë fakt.
Durim Bami i njohur ndryshe si ‘i forti i Niklës’, është personi i akuzuar nga ish-deputeti Tom Doshi se ishte porositur për ta vrarë, akuzë me të cilën u arrestua më 3 mars të 2015.
Më 4 korrik të 2018 ai u lirua nga Gjykata, pasi kjo e fundit e dënoi me 1 vit burg, por që dënimin ta kryente në ‘shërbim prove’.
Po kështu 41-vjeçari ka qenë i dyshuar në vitin 2004 për një tentativë vrasjeje. Ai është dyshuar për vrasjen e Erzen H. dhe Hasan K. Gjithashtu Durim Bami rezulton si personi i fundit që ka takuar shtetasin Enver Stafuka.
Më herët ai është dënuar me 4 vjet burg për veprën penale të pengmarrjes. Bami u ndalua edhe në shtator të 2018 nga një operacion i RENEA-s në Nikël pas informacioneve se në banesat e të fortëve në këtë zonë kishte armë, drogë dhe sasi eksplozivi.
Plagosja e 35-vjeçarit Kodra ndodhi sot rreth orës 15:20 në Tapizë, në rrethana ende të paqarta. Ai ndodhet në spital nën kujdesin e mjekëve, jashtë rrezikut për jetën. Forcat ‘Shqiponja’ dhe shërbimet e tjera të Policisë Krujë, kanë shoqëruar në ambientet e Policisë 5 shtetas të cilët mund të kenë dijeni rreth ngjarjes. Por ndërkaq po hetohet dhe për konflikte të mundshme të mëparshme të 35-vjeçarit.
Discussion about this post