Ambasada amerikanë ka postuar në Facebook një shkrim në lidhje me takimet e të Dërguarit të Posaçëm për Ballkanin Perëndimor Gabriel Escobar me zyrtarët kryesorë të Shqipërisë, si presidenti Begaj, kryeministri Edi Rama dhe të tjerë. Ambasada shprehet se Escobar, ka si temë të rëndësishme zgjedhjet vendore dhe nevojën për të zbatuar rekomandimet e ODIHR-it, që të përmbushen kërkesat e ligjit për kandidatët.
Ambasada amerikane: Gabriel Escobar, Zëvendës Ndihmës Sekretari i SHBA për Çështjet Europiane dhe i Dërguari i Posaçëm për Ballkanin Perëndimor, mbërriti sot në Tiranë për takime me Presidentin Begaj, Kryeministrin Rama, Ministren e Jashtme Xhaçka dhe udhëheqës të tjerë. Zëvendës Ndihmës Sekretari Escobar do të nënvizojë rëndësinë e zgjedhjeve të ardhshme vendore në Shqipëri, nevojën për të zbatuar rekomandimet e ODIHR-it dhe nevojën që partitë politike dhe liderët të sigurojnë që kandidatët të përmbushin kërkesat e ligjit si dhe pritshmëritë e qytetarëve shqiptarë për integritet të lartë. Ai do të diskutojë gjithashtu bashkëpunimin SHBA-Shqipëri për përparësitë rajonale dhe globale, përfshirë refuzimin e pushtimit rus të Ukrainës.
