Eduart Selami është kandidati i vetëm përballë Bashës për kryetar të Partisë Demokratike në zgjedhjet e 22 Korrikut.
I ftuar në “7 pa 5” ai ka komentuar garën që ka përballë Lulzim Bashës por edhe të pakënaqurit e tjerë në PD, duke theksuar se dhe midis tyre ka përçarje.
Po ashtu duke komentuar rolin e Sali Berishës, ai tha se lideri historik i demokratëve e ka shprehur hapur mbështetjen ndaj Bashës.
“Kjo nuk do të jetë një votë kundër Bashës si individ, kjo është një votë kundër modelit. Ajde ta kthejmë PD në një nga modelet më të mira që një parti ka në vend. Ka vend për të gjithë në Parti.
Sali Berisha e ka shprehur publikisht mbështetjen ndaj Bashës dhe i jap të drejtë pasi ai ka investuar te Basha”, u shpreh ndër të tjera Selami.
Ndërkohë që kandidati për kreun e PD-së ka komentuar dhe akuzat që i janë bërë për një shkrim pro Enver Hoxhës në kohën kur ka qenë student.
“Nuk jam krenar për atë gjë, më është dashur që të jem konformist dhe të mbijetoj, pastaj jam bërë bashkë me studentët e Dhjetorit. Unë nuk kam pasur asnjë lidhje me regjimin. Unë asnjëherë nuk kam bërë propagandë për diktatorin, e kam përmendur pasi kisha familjen dhe s’doja që regjimi të binte mbi ta”, u shpreh Selami.
Ai theksoi se asnjëherë nuk ka pasur simpati për atë periudhë të errët që kali vendi nën regjimin komunistë.
(E.K/SHUPLAKA)
Discussion about this post