Është Berisha ai që e mbështet Bashën? Topalli: Ndoshta është Rama

Deputetja demokrate Jozefina Topalli, e ftuar  në emisionin “Komiteti” ka deklaruar se pas kreut të PD-së Lulzim Basha, fshihet kryeministri Edi Rama.

Ky i fundit, sipas Topallit është personi që i jep mbështetje Bashës për ta çuar PD-në në situatën e rënduar.

Duke e quajtur një eksperiment të dështuar vendosjen e Lulzim Basha në drejtimin e Partisë Demokratike, Jozefina Topalli thotë se këtë qëndrim ja ka shprehur hapur edhe ish-kryeministrit Sali Berisha, liderit historik të së djathtës.

Por e pyetur nga gazetari Berat Buzhala nëse Basha e ka mbështetjen e zotit Berisha për vendimet e marra në PD, duke nisur që nga listat për zgjedhjet e 25 qershorit, Topalli ngre pikëpyetje se garancinë në veprimet e tij, ndoshta ja jep edhe kryeministri Edi Rama.

“Ku e gjen garancinë ky njeri që shkel skandencat elektorale, që nuk mbledh Këshillin Kombëtar, i turret dhe komitetit ndërkombëtar gjatë çadrës me një fjalor që unë nuk e kam dëgjuar. Kur s’pranonte të hynte në zgjedhje kam menduar se ka qenë presion, derisa sa kapërcyer skadencën elektorale. Thash nga ky njeri çfare s’mund të presësh. Tha: Unë kisha një zgjidhje tjetër; Të mos hyja në zgjedhje”, thotë Topalli.

Mirëpo, e pyetur nga Buzhala nëse është Berisha që e mbështet Bashën, përgjigja e Topallit ishte mjaft e habitshme.

 “Po ndoshta është zoti Rama. Ndoshta është dikush tjetër”, tha deputetja demokrate, duke forcuar dyshimet se kryeministri Edi Rama dëshiron fitoren e Bashës për kreune PD-së. (D.D/Shuplaka)