Pavarësisht se kryeministri ka shprehur gadishmërinë për t’i takuar studentët, dhe siç thotë ai për të zgjidhur problemet e tyre, ata mbeten të vendosur që të mos ulen në asnjë mënyrë për dialog pa u plotësuar kërkesat e tyre.
Megjithatë Rama është përpjekur që të komunikojë me ta përmes studiove televizive. Por ai dështoi kur deshi të flasë me ta në emisionin “Opinion”, pasi njëri nga studentët tha se nëse Rama do të futej në bisedë ata do të dilnin jashtë.
Megjithatë kryeministri duket se nuk ka hequr dorë dhe kërkon medoesmos që t’i ulë ata në bisedime dhe kërkon që “të ballafaqohet” me studentët në një tjetër ekran. Kreu i qeverisë ka rënë dakord që të dalë përballë një grupi studentësh në emisionin “Top Show” të gazetarit Alban Dudushi në Top Channel.
Por kjo lëvizje nuk është pranuar nga masa e studentëve. Ata e kanë refuzuar në mënyrë kategorike negocimin. Mes protestuesve qarkullonte këtë të martë edhe një sms ku thuhej se duhet “Të ndërgjegjësohen të gjithë se ata që do të shkojnë në ballafaqimin me Ramën në emisionin e Dudushit nuk përfaqësojnë”.
(B.H/Faxweb)
Discussion about this post