Ashtu si e kishte lajmëruar edhe dje Presidenti Nishani ka dekretuar ndryshimet e propozuara nga Rama në qeveri.
Edhe pse emri i Xhafajt ka qenë gjerësisht i kontestuar edhe nga opozita dekretimi i tij ka qenë e vetmja zgjedhje pas saktësimit në Kushtetutë.
‘’Në vlerësimin tim kandidatura e ministrit të Brendshëm është e papërshtatshme. Por, Kushtetuta nuk ia jep të drejtën Presidentit të Republikës për të refuzuar një kandidaturë për ministër, pasi i vetmi kusht i cili përcakton Kushtetuta për të qenë ministër është ai i kritereve për të qenë deputet.
Në rast se Kushtetuta e vendit do t’ia njihte të drejtën Presidentit, për të refuzuar propozimet e Kryeministrit bazuar në arsyetime, unë do ta refuzoja kandidaturën e ministrit të Brendshëm.
Në kushtet që Kushtetuta nuk ia njeh këtë drejtë Presidentit, unë besoj dhe shpresoj që ai institucion që Kushtetuta ia njeh këtë të drejtë për të vlerësuar kandidaturat për ministër që është Parlamenti i Shqipërisë, do të gjykojë dhe vlerësojë të gjitha rrethanat, situatën politike dhe specifikën që ka jeta shoqërore, publike e politike e vendit, që janë zgjedhjet e ardhshme politik’’, u shpreh dje Nishani.
Prej javës së shkuar Saimir Tahiri ishte shkarkuar nga Rama së bashku me tre ministra të tjerë, Blendi Klosi, Ilir Beqaj dhe Bledi Çuçi.
Në vendin e tyre janë emëruar Fatmir Xhafaj për Ministrinë e Brendshme, Ogerta Manastirlliu për Ministrinë e Shëndetësisë, Olta Xhaçka për Ministrinë e Mirëqënies Sociale dhe Eduart Shalsi për Ministrinë e Pushtetit Vendor.
Tashmë emrat e ministrave të rinj pritet të votohen edhe në Kuvend, ku nuk priten surpriza pasi LSI ka deklaruar se ndryshimet në qeveri janë vullnet i kryeministrit Rama. (E.K/SHUPLAKA)
